Tlawng lui-ah tuilian lo thleng thei laka mipuite inralrinna tur lo hrilhtu tur bun thar a ni

Irrigation & Water Resources Department (IWRD) huan tuilian lo thleng thei laka mipuite inralrinna tur lo hrilhtu, ‘Flood Warning System’ chu Tlawng-ah an bun fel tawh a. Tuilian a lo thlen dawn pawhin a hmain mipuite hnenah inralrinna tur tichhuak turin an inpeih tawh a ni.

IWRD thawktute sawi danin Flood Warning System hi hmun riat-ah bun niin hengte hi a ri leh hmuh theih chi (audio-visual) pali leh a ri chauh tichhuak thei (audio) hmun li-ah te a ni a. Audio-visual hi Sairang, Sairang Dinthar, Bairabi Hmar Veng leh Chhim Veng-ah te bun a ni a. A ri chauh tichhuak chi (audio) hi Hortoki-a hmun hnih, Sihhmui leh Sairang-Lengpui inkarah te bun a ni a. Flood Warning System an bunna hmunte hi mipuiten Tlawng an tlawhpawh zualna hmun te a ni a, tuilian lo thleng pawh nise he khawl hmang hian mipuite an lo inralring hman dawn niin an sawi.

IWRD thawktute chuan Tlawng-ah hian tui chim chin san zawng hriat theihna hmun ruk-ah an dah tih sawiin, hengte hi Pukpui leh Mausen inkar, Thenzawl leh Buarpui inkar, Darlung kai, Sihhmui, Buichali leh Bairabi-ah te a ni a, heng hmuna censor an dahte hian ruahtui tla zat, tui awm dan leh a chim chin san zawng an lo chhinchhiah anga, chu chuan hlauhawm lo thleng tur chu lo hmuin tuilian hlauhawm a thlen dawn chuan warning a tichhuak thin dawn niin an sawi a. Tuna khawl an dah chu a tangkai hle dawn nia sawiin, Tlawng hnarah ruahsur nasa vanga tuilian a awm dawn chuan lui mawng lam, Sairang leh Bairabi te chu an lo inring vek hman dawn niin an sawi a, “Nikum Cyclone Remal lo thlengah khan zanlaiah tuilian a siam a, mipui an buai em em mai a. Tuna khawl kan hman hnu hi chuan tuilian a lo thlen dawnin a hmain warning a pe ang a, mipui pawh an lo inring vek hman dawn a. Hei bakah hian kumtin deuh thawh Tlawng-ah hian tui tla an awm thin a, kan khawl hmang hian mi 2/1 tal nunna chhan theih kan beisei a ni,” an ti bawk.

Khawlin signal a pekchhuah dan tur sawi bawkin, “Visual (a lem) bikah hi chuan rawng chi li, a hring - Engmah hlauhawm lo; Serthlum rawng - Tuilian ve deuh, a sen - Hlauhawm tur leh nainawk rawng (purple)- Hlauhawm tak tak tiin a lantir anga. A ri chi (audio)-ah chuan chi thumin a ri ang a, a hlauhawm lo berah ri muang, tlema hlauhawmah ri zing deuh leh hlauhawm tak takah chuan siren rik pangngai angin a ri dawn a ni,” an ti.

Tlawng lui-a Flood Warning System hi National Hydrology Project 2016 hnuaia din a ni a, kum 2019 atang khan hmalak chhoh tan niin hri leng avangin harsatna a awm a, he Flood Warning System an bun hi India rama a hmasa ber niin Phillipines rama lui pakhat an tih atanga entawn a ni a. Tlawng hnarah ruah tam tham tak surin tuilian thleng palh ta se Bairabi chuan a hma darkar 24 velah an lo hre thei ang a, Sairang pawhin darkar hnih hma lamin an hre thei ang a. Tlawng-ah hian Flood Warning System hi enchhin phawt a ni dawn a, a tangkai dan azirin Mizoram lui dangah pawh la hman zel tum a ni.