LMC in Parking Fee mipui tana hman vek an tum

Lunglei Municipal Council (LMC) chuan nikum chhunga Parking Fee atanga sum an hmuh te chu a bo a bang awm lova mipui tana hman ni se an ti.

Zirtawpni khan LMC Board of Councillors (BoC) chu an Chairman Lalzuithanga kaihhruaiin BoC Meeting Hall, Convention Centre, Lunglei-ah an thukhawm a, he hunah hian nikum chhung khan Parking Fee atangin Rs. 18,31,349/- khawn chhuah a nih thu tarlan niin, LMC BoC chuan hei hi a bo a bang awm lova mipui tana hman nise an ti a, Lunglei khawpui chhung Traffic Marking leh mamawh bakah kawngpui siamna atan hman nise an ti a ni. Hei bakah hian LMC huamchhunga Ui leh Vawk khuahkhirhna dan hman lailawk tur chu an pawm bawk a, kumin 2025 atang hian LMC area-ah Garbage Free City Lunglei Project kalpui tura relin, Ward number I, II, IX leh XI te Pilot Project atan ruahman a ni a. Kumtin Ward dangah kalpui belh zelin, kum 3 chhungin ward 11 tuamchhuah tum a ni a. State sawrkar sum leh Urban Local Body sum atanga hma lak dan ngaihtuah nise an ti bawk.

LMC BoC thutkhawmah hian Finance changtu Executive Councillor Zorinsanga Hmar chuan kum 2025-2026 atana LMC sum hmuh dan tur leh sum hman dan tur ruahmanna, budget chu pharhin sawiho a nih hnuah lungrual taka pawm a ni a. LMC Budget 2025-2026 atan hian Rs. 24,63,97,208/- ruahman a ni a. Tax and Non-Tax Revenue atangin Rs. 20,86,73,000/- leh Capital Receipts-ah Rs. 3,77,24,208/- hmuh beisei a ni.