Thisen dawn atanga 93.71% voluntary donation

Health & Family Welfare Department chhinchhiah danin nikum (2024) April thla atanga kumin (2025) March thla inkara Mizoram chhunga Blood Bank ten thisen an dawn zawng zawng atanga zaa 93.71 chu a thlawna mi thahnemngai te pek a ni.

Mizoram chhunga Blood Bank hrang hrangten sawrkar kum kalta chhunga thisen an dawn zawng zawng hi Unit 34,752 niin heng zinga Unit 32,566, za zela 93.71 chu a thlawna mi thahnemngai te pek a ni a. Nikum April thla atanga kumin March thla chhung khan thisen pek runpui, Blood Donation Camp vawi 611 huaihawt a ni a, Blood Donation Camp-a thisen lakkhawm chu Unit 22,602 a ni.

Association for Voluntary Blood Donation (AVBD) General Secretary Lalrinkima chuan tunlaiah thiamna a san avangin thisen var an hman tangkai tawh thu a sawi a. Hei hi damlo te tan a sawt zawk hle tih sawiin, thisen var chu a dam rei loh avangin tum khata mi tam takin an pek aiin tlem te te pek ngun chu damdawi lama mithiamten an duh zawk thu a sawi a. Mi pakhatin kum khata vawi thum (3) tal a pek ngei ngei theih tur zawnga in ruahman chu pawimawh an tih thu a sawi a ni. AVBD General Secretary chuan thisen hman tangkai kawnga tunlaia thiamna a san tawh avang leh mihring an pun zel avangin thisen mamawhna a san tawh thu a sawi a, mipuite chu thisen pek ngaipawimawh turin a sawm a ni.