Lunglei District-ah TB vei mi 44 hmuh an ni tawh

Lunglei District-ah kumin January atanga April thla tawp thleng khan TB vei mi 44 hmuhchhuah an ni tawh.

Nimin khan Lunglei District TB (Tuberculosis) Forum chu DC Conference Hall-ah thukhawmin an District-a TB dinhmun an thlirho a. Health & Family Welfare Department data ang chuan Lunglei Health District-ah hian mihring 1,89,094 vel awm anga chhut niin, khawpui-ah mi 86,136 leh thingtlang-ah mi 1,02,958 cheng anga chhut a ni a. Kum kalta (2024 ) January atanga December thla chhungin Lunglei Health District (Lunglei District leh Hnahthial District)-ah ngawr (TB) vei rinhlelh enfiah 3,772 atangin TB vei hmuhchhuah 147 an awm a, heng zingah hian Chuap TB 77, Chuap ni lo TB 66 leh MDR-TB 4 an awm a. Mi 134 enkawl dam niin TB vei enkawl laia thi 6 an awm a ni.

Kumin (2025)-ah January atanga April thla chhungin Lunglei Health District-ah hian TB rinhlelh enfiah mi 644 atangin TB vei mi 44 hmuh an ni tawh a, heng zinga 24 te chu Chuap TB niin Chuap ni lo TB 17 leh MDR-TB 3 hmuhchhuah an ni a, kumin hian mi 39 te hlawhtling taka enkawl niin enkawl laia thi mi pahnih an awm bawk.

Lunglei Health District-ah hian khaw 186 awmin kum 2023 khan TB awm lohna khua (TB Free Village)-a puan khaw 18 awmin, kum 2024-ah khaw 22 a awm a. Kum 2023-a TB Free Village kum 2024-a puan nawn (Mahatma Gandhi Statue Silver dawng) khaw 9 awmin, a kum khatna atana puan thar (Mahatma Gandhi Statue Bronze dawng) khaw 13 an awm thung. TB Free Village ni tur hian kum khat (January - December) chhungin khaw khata mihring cheng zat azirin mi 1,000 zelah mi 30 tal endik tur niin, mi 1,000 zelah TB vei nem ngheh mi pakhat aia tam an ni tur a ni lova; TB vei enkawl hlawhtlin 85% aia sang tur niin, TB veite chuan Nikshay Poshan Yojna (NPY) leh Nikshay Mitra tanpuina an dawn ngei a tul bawk a ni.

District TB Official-te chuan TB hrik en leh damlo enkawlna chu sawrkarah a thlawn vek a nih bakah NPY hnuaiah damdawi ei chhung zawng thla tin Rs. 1,000/- pek an nih thu leh inenkawl zawh hnuah Rs. 750/- pek thin an nih thu sawiin, TB chu enkawl hma a, tha taka damdawi ei chuan a dam hmain,harsatna nasa zawk a pumpelh theih tih an sawi a. TB veite'n an inenkawl chhunga chaw tha an dawn theih nan mi inphal (Nikshay Mitra)-te hnen atangin tanpuina sum dawn thin a ni bawk a. Nikshay Mitra (donor)-te sum pek hmang hian thla khatah damlo pakhat tan Rs. 700/- man ei tur tha leisaka pek thin an ni a. Nikshay Mitra tur hian thla tin Rs. 700/- hisapin thla ruk emaw, a aia rei emaw chhung atan tanpuina pek theih a ni bawk.