Serchhip District-a NABARD hnuaia hmalakna enfiah

National Bank for Agriculture and Rural Development (NABARD) Assistant General Manager Saroj Kumar Mahera chuan nimin khan Serchhip District-a an Project te a hmunah tlawhin a enfiah.
NABARD Assistant General Manager hian Tribal Development Funds (TDF-III) hnuaia North East Initiative Development Agency (NEIDA) Serchhip nen tangkawp hma an lakna pakhat Keitum khuaa Khangpui zau chu fanpui niin NEIDA Serchhip District Coordinator Jacob Lalrammawia chuan an hmalakna hrang hrang a hrilhfiah a, Serchhip Block chhunga Kuthnathawktu (Farmer’s) mi 200 ten Huan/thlai ah eizawnna ngialnghet an neih theih nan NABARD leh NEIDA Serchhip tangkawp chuan Serthlum tiak an pek thu te, a kara chin tur thlai chi hrang hrang bakah a enkawlna tur Leitha leh rannung laka venna chi hrang hrang pek an nih thu te a sawi a, Inchhung-a hman tur Tui dahkhawlna leh Cooker pek an nih thu te tarlang bawk.

He hunah hian Farmer’s te hlawhtlinna leh an tihthat loh lai te bakah tanpui an ngaihna te a hmunah hian enfiah nghal a ni a, an hmalam hun atan ruahmanna hrang hrangte siamsak an ni bawk. NABARD Asst. General Manager hi Asst. Manager (AM) in a rawn tawiawm a ni.