Serchhip-ah Governor's Discretionary Grant sem

Serchhip Bawrhsap chuan Governor's Discretionary Grant atangin nimin khan Serchhip District-a Home hrang hrangah tanpuina sum a semchhuak.
Hemi puala Serchhip DC Meeting Hall-a hun hman chu SDO (Sadar) Rebecca Laldinmawiia Hrahsel chuan kaihruaiin Governor's Discretionary Grant sem a nih chhan a sawi a, Governor in mi harsate dawmkanna atana he sum hi pek thin niin chhawmdawlna In-ah te pawh pek thin a nih thu a sawi a. Kum kalta Krismas dawnah pawh khan heng chhawmdawlna In hrang hrangah hian pek a nih tawh thu a sawi bawk a. Tun tumah hian chhawmdawlna In leh School hrang hrangah te Rs. 10,000/- theuh hlan a ni.

Tun tuma tanpuina dawngtute hi Adult Rehabilitation Centre, Chhiahtlang; Beiseina In (Old Age Home), New Serchhip; Zoar Urban Deprived Home, New Serchhip; Unity Orphanage Home, Serchhip Hmar Veng leh Shalom Special School, New Serchhip te an ni a. Heng tanpuina sum hi Bawrhsap Paul L. Khuma chuan hlanin Chhawmdawlna In enkawltute nen thawh-hona tur a awm a nih chuan an inhawn reng thu a sawi a. Harsatna an nei a nih pawhin tanpui tura inhuam reng thu sawiin, Governor in duhsak taka tanpuina sum a pekte pawh tangkai taka an hman theih a beisei thu a sawi bawk.

Nimin-a tanpuina sum semna hunah hian heng Home leh School-a thawktute hi telin anni bakah hian SDC Dr. Vanlalchhanhimi leh Dr. Marylin Lalruatkimi te pawh an tel a ni.