Serchhip-ah Blackout leh Civil Defence Mock Drill nei dawn
Nimin khan Serchhip DC Meeting Hall-ah Serchhip District Civil Defence Committee chu an Chairman leh Bawrhsap Paul L. Khuma kaihhruaiin an thukhawm a, he hunah hian indona a lo thlen thulha mipui te awm dan tur nunchan zirna, Civil Defence Mock Drill leh Blackout chungchang sawiho niin tunhnaiah India leh Pakistan indona a thlen avangin India ram pumah mipuite inralrin dan tur zirtirna kalpui a ni a. Inkahhaina (cease fire) awm tawh mah se, sawrkar chuan mipuite inzirtirna hi kalpui ngei tul a ti a. Hei vang hian Serchhip khawpuiah May ni 15, 2025 (Ningani) hian Civil Defence Mock Drill leh Blackout neih nise an ti a ni.
He nunchan zirna hun hi May ni 15, 2025 (Ningani) zan dar 8:30-ah neih tur a ni a. Zan dar 8:30-ah Serchhip khawpui Veng tina Information Mic kaltlangin ralkhel dar (siren) minute khat chhung tihrik a ni a nga. Siren rik zawh veleh kawlphetha pekchhuahna hmunpui atangin Power Supply tih tawp a ni anga. Hemi hun chhung hian Emergency Light emaw, Inverter emaw pawh tih thim vek tur niin, mahni parda thlenga zar thim vek tur a ni a. Kalkawnga lirthei tlan lai te pawh an awm hmunah dingin, engine leh light te tithim vek tura beisei an ni. Minute 5 chhung blackout hi neih a ni a nga, zan dar 8:35-ah eng te tihnun leh a ni ang.
He hunah hian Van chung sang atangin thlawhna in IOC Petrol Pump chu rawn kap a kangmei nasa tak chhuak anga lemchan tur a ni a. Team hrang hrang insiamin Search & Rescue Team ah hian Serchhip District QRT te, Fire & Emergency Service te, Police te, Assam Rifles leh BSF te an che chhuak anga. Damdawi In atanga Ambulance kalin mitthi leh hliam tuar lema chang te an phurchhuak dawn bawk a ni. He thutkhawm ah hian sawrkar mi pawimawhte leh mawhphurhna nei te an tel a ni.
Comments
Post a Comment
I ngaihdan i sawi hian mipui ngaihdan i tarlang a ni!