RD Minister in sawrkar laipui-a RD hotute a kawm

Rural Development & Administration Department changtu Minister Prof. Lalnilawma chuan nimin khan Union Minister of State for Rural Development Kamlesh Paswan leh Ministry of Rural Development changtu Secretary Shailesh Kumar Singh te kawmin MGNREGA (ni 100 inhlawh) hnuaia mipui inhlawhna leh MGNREGA staff-te hlawh chungchang bakah Material Component chungchangte a sawipui a. Ministry of Rural Development hotute hian MGNREGA hnuaia parameter hrang hrangah Mizoram chu State ti tha ber pawl an nih avangin a rang thei ang ber a mipui inhlawhna leh Material Component bakah Staff hlawh tur Administrative Cost-te Mizoram chu Fund pek a nih tur thu an lo hrilh a. Central Ministry hotute hian PMAY-G chungchang ah State Sawrkar in a mamawh ang zel a staff rawih nan Administrative Cost pawh 2% piah lam thlenga hman phal sak an nih thu leh State Sawrkar chu rawtna rawn siam vat turin Minister hi an lo hrilh bawk a ni.