MJA Member ten tunlai boruak an sawiho

Mizoram Journalists Association (MJA) General Hqrs. buat-saihin tunlai thil thleng, Raltlan, Ramri hung leh Ruihhlo chungchang sawihoin nimin khan Aizawl Press Club-ah General Body Meeting neih a ni.

He hun hi MJA President C. Lalrambuatsaiha chuan kaihruaiin Senior Journalist HC. Vanlalruata chuan thupui sawihawngin, India leh Myanmar ramri a zalen taka inkalpawh theihna Free Movement Regime (FMR) chu kum 1951 atanga hman tan a nih thu a sawi a, “FMR hi tha taka a kal laiin Manipur sawrkar nawrna avangin Sawrkar laipuiin February 2024 khan a titawp a, tihtawp a nih chhanah hian helpawl leh dan lova ruihhlo leh thil chi hrang hrang tawlh thin tihtawp duh vang nia sawi a ni. FMR hlih a nih rual hian ramri hung pawh sawi rik nghal a ni a, hei pawh hi Manipur Sorkar ngenna vang bawk a ni,” a ti.

Hei bakah hian sawrkar chhinchhiah danin, niminpiah thleng khan Mizoram-ah Myanmar raltlan 33,000 vel an thu paw sawiin, Champhai District-ah mi 13,586, Siaha District-ah mi 6,017, Lawngtlai District-ah mi 4,876 leh Aizawl District-ah mi 3,716 an awm tih a sawi. Raltlante tan hian Relief Camp 125 siam a ni a, chhungte bel leh mi in luaha awm mi engemaw zat an awm tih a sawi bawk.

He hunah hian Ramri hung a thatna leh that lohna tur te, raltlante chungchanga sawrkar leh pawl hmalakna atana tul nia an hriat te, raltlan chhinchhiahna, khuahkhirhna leh kaihhruaina tha leh mumal zawk siam a tul thu te, ruihhlo dona leh ruihhlo ngaite enkawlnaa sawrkar, Kohhran leh pawlte tan lakna turte leh thildang te an sawiho bawk a ni.