Mizoram-a Myanmar raltlan awm mek te Biometric data khawnkhawm hna tan thuai tum

Mizoram-a Myanmar raltlan awmte mit naute thlalak leh kutzia chhinchhiahna (biometric data) khawnkhawm hna tan thei turin ruahmanna siam mek a ni a. Bangladesh atanga raltlan Mizoram a awm te erawh chu Biometric enrolment khawn a nih dawn leh dawn loh hriat ala ni lo thung.

Home Department hotute sawi dawn danin kar kalta Zirtawpni khan Ministry of Home Affairs (MHA) thuneitute nen Mizoram-a Myanmar raltlan awmte mit naute thlalak leh kutzia chhinchhiahna (biometric data) khawnkhawm chungchang hi biakhmuhtheih kaltlangin sawiho a ni a. Ruahmanna lo siam lawk tawhte a taka kalpui tura inbuatsaih mek zel a ni a, bultan theih thuai tum a ni. Home Department hotute chuan Myanmar ram tlanchhiatsana Mizorama awm mekte biometric enrolment kalpui tur hian sawrkar laipui chuan MNF sawrkar lai atang tawh khan an rawn nawr tawh a. Online Portal a a khawnkhawm dan tur an rawn dah chu an rama thawnkir turte tana duan a nih vangin Mizoram sawrkar chuan siamtha turin MHA lamah an vawm thla leh a. Tun hnua an rawn siamthat leh tak hnuah ruahmanna hi a thara kalpui a ni leh ta a. Tunah hian engkim peihfel tawh a nih avangin raltlante biometric data lakkhawm hna hi thawh theih thuai tura an ngaih thu an sawi a ni.

Kum 2021 March thla chawhma lam atanga an ram chhuahsan a Mizorama rawn lut Myanmar raltlante hi tun dinhmunah 33,023 an awm mek niin sawrkar chuan a chhinchhiah a. An zinga mi 17,551 te chu raltlan dahkhawmna hmun 125-ah awmin mi 15,472 te erawh chuan an chhungkhat lainate leh thiante an belh bakah mi In luahin an inhlawhfakna hmunah an khawsa a. Raltlan zinga 12,361 te hi naupang an ni a, mi 10,416 chu hmeichhia niin mi 10,246 te chu mipa an ni. Champhai District-in Myanmar raltlan a mikhual hnem ber a, mi 13,586 zet awmin Lawngtlai District-ah mi 6,017 leh Siaha District-ah mi 4,976 an awm a, Aizawl District-ah pawh 3,716 awmin District dangah tlem tlem an awm bawk a ni.

Hetihlai hian Home Department hotute chuan Bangladesh atanga raltlan Mizoram a awm mi 2,000 chuangte chungchang chu an hriat rih loh thu an sawi a. Biometric enrolment khawn a nih ve tur leh tur loh chu Myanmar raltlante endik zawh lamah sawrkar laipui thu ang anga kalpui a ni dawn niin an sawi a ni.