Chief Minister leh Social Welfare Minister ten Mizoram-a ruihhlo hluar dona an sawidun

Chief Minister Lalduhoma leh Social Welfare Minister Lalrinpuii te chuan Zirtawpni kalta khan Mizoram-a ruihhlo hluar zel dona chungchang leh ruihhlo ngaite enkawlna chungchang an sawidun.

Chief Minister Office-a he sawihona hunah hian Social Welfare Department chuan an hmalak mekna te leh an hmachhawp te an sawifiah a. Mizoram-a Ruihhlo ngai enkawlna Integrated Rehabilitation Center for Addicts (IRCAS) 11 te tihlenna tur te, hetiang Center la awm lohna District 5 (panga) Saitual, Khawzawl, Hnahthial, Lawngtlai leh Mamit-a din ve na tura Ministry of Tribal Affairs-a funding an zawn mek thu te, Thingsulthliah-a Multi-Disciplinary Treatment & Training Center din tur chungchang leh Jordan Center kalpui dan turte an sawi a ni.

Chief Minister chuan ruihhlo ngai Center-a awm te an damchhuah tak tak theih nan After-Care Skill Development ngaih pawimawh a tul thu leh Jordan Center pawh thiamthil an zir nghalna hmuna siam a that thu sawiin, hma lo la nghal turin a chah a. TNT te leh Kohhran in a enkawl De-addiction Center te pawhin Skill Development Program hi an kalpui theih dawn chuan a tul anga sawrkarin Grant-in-Aid pek a inhuam thu a sawi a. Hemi kawngah hian SWD Minister hian hma a lak nghal tur thu Chief Minister hi a hrilh a ni.

He hunah hian TBCC chungchang pawh sawiin Social Welfare Minister Lalrinpuii hian, sawrkar kaihhruaina hnuaiah an enkawl zawh tawk admit a, mumal zawka Kohhran leh khawtlang hruaitute nen thawkho chunga an kalpui dan tur a sawipui tur thu a sawi a ni.

SWD Minister hian Zirtawpni vek khan Kohhran hrang hrang hotute leh NGO Central YMA, MUP, MKHC, CCM te a kawm nghal a. The Mizoram Drug (Controlled Substance) Act, 2016 leh The Mizoram Drug Treatment-cum Rehabilitation Center Accreditation Rules, 2019 leh a hnuaia guidelines te chu zawma Center zawng zawng ten sawrkara an inziahluh vek a tul thu hrilhin, a inziaklut te chu sawrrkarin puih an tum dan te pawh a hrilh a. Ruihhlo ngaite enkawlna leh a invenna lama anmahni zawn theuh a tan la tura ngenin, thawhpuiah a sawm a ni.

He Inkawmnaah hian Kohhran lam atangin Presbyterian Church of India (PCI), Baptist Church of Mizoram (BCM), Salvation Army, Seventh Day Adventist leh Isua Krista Kohhran (IKK) aiawh te an tel a, ruihhlo hluar zel leh ruihhlo ngai pung zel chu pawi an tih thu leh an ngaimawh thu sawiin, a theih ang anga hmalak tul an ti tlang a. Ruihhlo ngai enkawl dam chu thil harsa tak anih avangin Pathian thu leh Kohhran behchhana kal a tul thu sawilan niin, a invenna lamah Kohhran ten awareness/inzirtirna nasa zawka kalpui nise an ti bawk.