All India Radio FM Zoawi hi 100.7 MH tharthawh leh

All India Radio (AIR) Aizawl chuan Aizawl FM Zoawi 100.7 chu hun rei tak an chawlhsan hnuah nimin khan thar thawhin an hawng leh ta.

All India Radio FM Zoawi hi 100.7 MHz-ah August ni 15, 2008 atanga bultan niin Programme hrang hrang tihchhuah thin a ni a, hun rei tak a kal hnuah January ni 20, 2024 khan tihtawp lailawk a ni a, nimin khan rampuma Radio Station-ah FM channel thar thawh leh a ni. Nimin-a FM Zoawi awm thar leh tur puala hun hmanah hian AIR Aizawl Director leh Akashvani leh DDK Mizoram Cluster Head ni bawk, DR. Lalropuia chuan tunlai Social Media leh Internet khawvel ah mi nawlpuiin Radio an ngaihthlak tam tawh loh laiin All India Radio Aizawl programme la chawinung rengtu FM Zoawi thar thawh leh a ni chu lawmawm a tih thu sawiin, mipuite chu FM Zoawi ngaihlua lo ngaithla zel turin a ngen a. FM Zoawi chu thalai te duhzawng tura duan a ni tih sawiin, a tir te atangin mipuiten an hlut thu leh ngaithlatute chu Mizoram chhung bakah Mizoram chhehvêl atangin an awm thin thu a sawi a. Mizo, English leh Hindi a puan a ni thin chu Mizo fate an duai bik lo tih tilangtu a nih thu a sawi bawk.

AIR Director chuan harsa taka All India Radio hmasawnna atana an thawh chhoh dan sawiin, FM Zoawi 100.7 MHz chu a tira darkar 5 chauh FM Zoawi programme awm thin chu tunah chuan nitin darkar 14 lai an neih theih tak thu leh mobile app hmanga live stream-in a kal thei tih a sawi a. Kum 2019 August ni 15 khan chhun program chu chawhma dar 11:00 atanga chawhnu dar 2:00 hawn belh a ni tih a sawi bawk.

All India Radio FM Zoawi hi AIR Studio, Tuikhuahtlang atanga tihchhuah thin a ni a, kum 2022 August ni 15 khan a kum 15-na champha phak an lo lawm tawh a ni.