Kumin-a Thla thum leh a chanve chhungin ruihhlo cheng Vbc. 52.00 hu man tawh

Mizoram Police te chuan kumin January atanga April 15 thleng khan ruihhlo chi hrang hrang Rs. 52,00,15,865 hu man an nei tawh a, hemi kaihhnawiha mihring an man tawh zat chu mi 115 a ni. Hetihlai hian tleirawlho zingah Ganja a hluar niin Excise & Narcotics Department hotute chuan an sawi thung.

Mizoram Police tarlan danin kumin (2025)-a thla thum leh a chanve chhunga ruihhlo chi hrang hrang tam tham tak manin hemi kaihhnawih ah hian thubuai 84 ziahluh an nei a, thubuai ziahluh zingah hian Heroin kaihhnawihah thubuai ziahluh a tam ber a. Ruihhlo hrang hrang man zingah Methamphetamine chu man tam ber ni thungin hemi hun chhung hian kg 239.968 man an nei a, chu chu Rs. 31,19,58,400 hu niin heng kaihhnawiah chuan thubuai 14 an ziaklut bawk a, mi 13 lai an man bawk a ni.

Kumin January atanga April 15 thleng khan Heroin kg 16.068 man tawh bawkin chu chu Rs. 4,82,04,000 hu a tling a, thubuai 64 ziahluh niin mihring man 91 an awm a. Ganja kg 8.825 man tawh bawkin Rs. 44,125 hu a ni a, thubuai pathum ziaklutin mihring man panga an awm bawk a ni. Hemi hun chhung vek hian Crystal Meth pawh kg. 5.169 an man bawk a, hei hi Rs. 15,50,70,000 man nia chhut niin thubuai pakhat ziahluh a awm a, hemi kaihhnawih ah hian mi pahnih an man bawk a. Caffeine pawh kg 3,000 man tawh bawkin Rs. 45,00,000 man nia chhut a ni a, thubuai pakhat ziaklutin mi man pahnih an awm a. Hemi hun chhung vek hian Opium kg 3.989 man bawkin, Rs. 2,39,340 ma hu a ni a, thubuai pakhat ziaklutin mi pahnih man an awm bawk a ni.

Hetihlai hian Excise & Narcotics Department hotute chuan tunlaiin Mizo tleirawlho zingah ganja a hluar nia sawiin, man pawh an man hnem niin an sawi a. END tarlan danin, kumin January atanga April thleng khan Mizoram-ah Ganja kg 110.421 man a ni tawh a, nikum 2024 chhung khan kg 578.592 zet man a lo ni tawh bawk a ni.

Excise & Narcotics Department hian kumin January - Arpil chhung khan Heroin kg 22.761 an man a, nikum chhung khan kg 46.680 an lo man tawh bawk a. Hemi hun chhung vek hian Methamphetamine kg 44.111 man an nei bawk a, nikum chhunga an man zat chu kg 140.839 zet a ni.