Electric man naupang pahnih damdawi In-ah enkawl

Khawzawl District chhung Chawngtlai khua a naupang pahnih chu Pathianni tlai khan Electric in a man a, Khawzawl District Hospital-ah enkawl an ni.

Thudawn danin Pathianni tlai khan Chawngtlai naupang pathum chu Chawngtlai Presbyterian Biak In chhak lawka khamah lawnin lung tohlawt-ah an awm a, an awmna lung tohlawt atang ban phak maia awm Tualte khaw eng pekna electric hrui chu an zinga pakhat Lalsangkima Pachuau (9) chuan khawih palhin Current-in a man a, a bula awm Lalnunsangi (11) chuan chhan tumin a vuan a, an awmna atang hian tlain an zinga tel ve Thla-muanpuia erawh vanneih thlak takin a him thung a. An mangang au thawm hi Chawngtlai Phai Veng-a awm Tlangthanmawia chuan hriain a han bawih-sawm nghal a, hmeichhe naupang hi hun engemaw chen chu nikhaw hre lovin a awm zui a. Hemi zan la la hian Khawzawl District Hospital panpui nghalin tunah hian Damdawi In-ah enkawl mek an ni.

Chawngtlai naupang chetsualna hmun hi tunhma lam atang tawha naupang len vahna thin nia sawi a ni a, helai khama lung tohlawt atanga khawih phak maiah hian Tualte khua eng pekna hruipui (electric line) kal hi enfiah nghal niin mipui tana him turin siam nghal a ni.