Assembly-a Subject Committee-III ten Hnahthial-a School of Agricultural Sciences an tlawh

Mizoram Legislative Assembly-a Subject Committee-III chuan nimin khan Hnahthial District-a School of Agricultural Sciences chu tlawhin SAS hnuaia building sak mekte an enfiah.

Hnahthial-a School of Agricultural Sciences an tlawhna ah hian Subject Committee-III Chairman Jeje Lalpekhlua chuan Subject Committee-III chu India Democracy hnuaia thuneitute inventawnna, Principal of Check and Balance awm theihna tura duante zing ami anih thu sawiin, India Danpui, Article 208 hnuaia siam, Rules of Procedure and Conduct of Business in Mizoram Legislative Assembly in a a din a nih thu a sawi a. Chuvang chuan member-te pawh Ruling leh Opposition Bench atangin an awm thu a sawi a. Subject Committee-III chu Committee hrang hrang 20 zinga pakhat a nih thu tarlangin, an subject-ah Agriculture Department a awm thu a sawi a. Chumi avanga chuan Agriculture Department hnuaia mi, School of Agricultural Sciences (SAS) chu tlawh an nih thu leh Assembly-in Budget a pass tak atanga Allocated Funds hman a nih tawh dan te chu a hmunah enfiah duha rawn kal an nih thu a sawi a ni.

SAS Auditorium-a thawktute nen an inkawmna ah Hnahthial Bawrhsap K. Vanlalruati chuan MLA ten Hnahthial an tlawh chu lawmawm a tih thu sawiin, Hnahthial chu District thar a nihna angin duthusama a la changtlun loh thu sawiin. an mamawh te a thlen a. Agriculture Department-a Joint Director A&FW Ramnunsanga chuan School of Agricultural Sciences mamawhte tarlangin SAS zirchhuak ten an dil theih - SAS-II, Gram Sevak an tih chu post fill up loh a la tam thu a tarlang a. Chu mai bakah Mizoram Agriculture Service (MAS) chu tun dinhmunah hian Junior Grade post 77-ah post 15 chiah hnawhkhah rih a nih thu a tarlang bawk.

Hemi hnu hian Spot visit neih nghal niin Infrastructural Support for SAS Phase-II, NABARD RIDF -XXVII (2022-23) hnuaia building leh thil dang sak mek te chu a hmunah endikna neih a ni a. Instructor Quarter (Type -III) (estimate cheng nuai 150); Staff Quarter (Type -II) (estimate cheng nuai 180); Boys Hostel (estimate cheng nuai 180) leh Guest House (estimate cheng nuai 130) sak mekte chu a hmunah endikna an nei a. Committee member-te chuan a hmunah SAS in a mamawh belh turte enfiahin an chhinchiah nghal a ni. Heng building endikte hi luah luh vat theih tura peihfel thuai besei a ni.