Serchhip College helna kawng siam turin hma la

Govt. Serchhip College ram chu Khawte-tlang panna kawng in a paltlang avangin he kawng hmang lova Khawtetlang kalna kawng hi siam turin hmalakna kalpui mek a ni.
Serchhip DC Office-a thawktute Quarters leh sawrkar Quarters engemaw zat awmna Khawtetlang panna kawngpui hi Govt. Serchhip College gate puiah lutin College Campus a paltlang avangin hun engemaw chen atang tawh khan a panna tur kawng dang zawn nise tih rawtna hi a lo awm fo tawh thin a, tunah hian he kawng thlakna tur hi ngaihtuah mek niin tunhnai khan Serchhip-ah Bawrhsap Paul L. Khuma hovin a Pisa-ah he kawng siam dan tur hi sawrkar mi pawimawh ten an sawiho a ni.

He sawihona hunah hian PWD Serchhip Division-a SDO Lalrinhlua chuan Powerpoint hmangin kawng aih theih dan tur hrang hrang a sawifiah a, ruahman ang chuan Govt. Serchhip College Main gate atangin chhuah lamah kawng hi sial tura ruahman a ni a, hei hi a hmunah pawh enfiah zui tura tih niin chumi zawhah PWD lamin estimate siamin Govt. Serchhip College lamin sum dil dan tur an ngaihtuah dawn a ni.