Pawl 2 in MUHCS duh lo

Vawiin atanga a taka hman tura ruahman pawisafai pek ngai lova damdawi lama inenkawl theihna tur, Mizoram Universal Health Care Scheme (MUHCS) chu pawl pahnih in an duh lo tih an sawi.

Sumfai pek ngai lo (cashless) a kalpui tura ruahman MUHCS hi Vawiin, April ni 1, 2025 atanga a taka hman tan tum ni mah se Non-Government Hospital Association of Mizoram (NGHAM) chuan tun dinhmuna an zawm theih loh tur thu Mizoram State Health Care Society-a Chief Executive Officer chu March ni 28 khan an hriattir a. Mimal leh kohhran enkawl damdawi In-te hi te hi nitin-a pawisa lut hrang hrang hmanga kal hram hram an nih avangin Cashless anih chuan an inenkawl zo dawn lova, damdawi In sum chevel a buai phah dawn avangin an tan damdawi In enkawl a harsat phah dawn niin an sawi a. Hun kal tawha Mizoram sawrkar hnuaia Healthcare Scheme hrang hrangte kalpuina-ah NGHAM member damdawi In te chuan belhkhawmin cheng vbc. 4 chuang an lo hloh tawh niin an sawi bawk.

NGHAM chuan Mizoram Universal Health Care Scheme thar duan, cashless hi tun dinhmunah chuan an zawm theih loh thu leh hemi avanga mipui tawrhna nasa tak lo thleng thei hi pumpelh a nih theih nan a hma a re-imbursement kalphunga an kal ang khan kal leh phalsak turin an ngen bawk a ni.

Hetihlai hian Mizoram sawrkar hnuaia thawk inzawmkhawm pawl, Federation of Mizoram Government Employee & Workers (FMGE&W) pawhin MUHCS zawm ve an duh loh thu hi Chief Minister hnenah tunhnai khan an thlen bawk a. An zawm ve duh loh chhan hrang hrang an tarlan zingah damdawi lama inenkawlna rate tlawm taka siam a nih avangin anmahni'n a hranpin sum tam tak an seng dawn ni a sawiin, an duh lo niin an sawi a ni.