Sanctuary humhalh beihpui

Association for Environment Preservation (ASEP) chuan nimin khan Tawi Wildlife Sanctuary chhehvel khua pathum Mualpheng, Tawizo leh Lenchim khuate tlawhin he Sanctuary humhalh beihpui an thlak a, he hunah hian ASEP President K. Lalmuansanga leh a thawhpuite kalin heng khaw hrang hranga VC leh YMA hruaitute an kawm a, Tawi Wildlife Sanctuary hi Mizoram laili taka awm a ni a, Mizoram tan hmun pawimawh tak a nih avangin ASEP chuan humhalh beihpui thlakna hi a kalpui a. Remchan dan ang zelin khaw dang dangte pawh tlawh zel tum niin chhungtinte hnena ngenna lehkha sem nghal zel a ni. Heng khawtlang hruaitute pawhin ramngaw leh nungcha humhalhna kawngah theihtawp chhuah an tum thu ASEP hruaitute hi an lo hrilh ve bawk a ni.