Mizoram Universal HealthCare Scheme atan Vawiin atangin inziahluh theih a ni dawn

Mizoram sawrkar chuan Vawiin, April 1, 2025 atang hian Mizoram Universal Health Care Scheme (MUHCS) chu hman tan a tum a, Vawiin atangin District chhunga Health Sub-Centre leh Health & Wellness Centre-ah te inziahluhna hun hawn tan a ni ang.

Mizoram Universal HealthCare Scheme hnuaiah hian damdawi In-a inenkawlna chu package anga kalpui a ni dawn a, mahni insenso ngai lovin damdawi In luh ni atanga chhuah ni thleng pawisa pek ngai lo (cashless) hmangin damlo te chu an inenkawl thei dawn a, an inenkawlna senso chu sawrkar in a pek sak dawn a ni. MUHCS hamthatna hi Mizoram chhunga sawrkar damdawi In zawng zawngah leh he Scheme zawmtu Private damdawi In, Mizoram chhung leh pawn ami ah te hman theih tura duan a ni a, MUHCS policy 2025-26 hi April ni 1, 2025 atanga March ni 31, 2026 thleng a hman theih dawn a ni.

Ruahman dan chuan inziahluh theih hun hi thla thum (3) chhung, March 2025 atanga May 2025 hawn a ni dawn a, March 2025 atanga May 2025 chhunga inziaklut hman lo te tan July 2025 chhung inziahluhna hun (Grace Period) hawn a ni leh dawn a, a tlai te tan Late Fee, inziahluh man pangngai aia zaa 50 a sang pek a ngai tawh thung dawn a ni. Ruahman dan chuan MUHCS-ah hian chhungkaw pakhat in Rs 5,00,000 thleng inenkawlna senso chawi lovin damdawi In-ah an inenkawl thei dawn a, an awm duhna Ward azirin inziahluh man (premium) pek ngai zat a danglam a, General Ward-a awm duh tan Rs 2,500, Semi Private Ward-a awm duh tan Rs. 5,000 leh Private Ward-a awm duh tan Rs 10,000 pek a ngai a ni.

‘Mipui Healthcare’ hi Mizoram khua leh tui zawng zawng huap tura duan a nih angin a hmang thei turte chu Central Scheme AB PM-JAY hmang thei zawng zawng; Mizoram sawrkar hnathawk leh an dependent family member te; Mizoram sawrkar hnuaia Provisonal Employee/Muster Roll te leh an chhungte; Sawrkar hnathawk Pensioner-te leh an chhungkua bakah tarlan zinga tel ve lo chhungkua zawng zawng te a huam a ni.

Health Minister Lalrinpuii chuan damdawi ina inenkawlna man cashless-a kalpui chu policy-a an lo tiam tawh a nih tawh avangin an kaltlangpui lo thei lo niin ZALEN a hrilh a, chumi tur atan chuan sawrkar damdawi in hrang hrangte pawh tihchangtlun mek a nih thu a sawi bawk.

Damdawi-a inenkawlna senso pek ngai lo tura duan MUHCS hi March 19, 2025 khan Chief Minister Lalduhoma chuan a tlangzarh a. Non Government Hospital Association of Mizoram (NGHAM) te chuan an pawl a tel Private/Kohhran damdawi In 20 chuangte chuan sawrkarin kalpui a tum dan chu tlinah an inngaih loh avangin tun thlengin MUHCS-ah hian an la tel lo tih an sawi a. Hemi chungchang ah hian Health Minister chuan Healthcare-ah cheng vbc. 13 dah nghal a nih dawn thu leh a rang lama tihhlawhtlin nghal a nih dawn thu a sawi bawk a. “Chief Minister chuan Private Hospital-ah hian an lo invenna atan an Bank Account-ah sawrkarin cheng nuai 50 dah lawk a inhuam thu a sawi bakah bill pek tlak chhung hi a rei lo berah kar khat (ni sarih) ni se, a rei berah thla khat (ni 30) ni se, hemi hi sawrkarin a pel a nih chuan penalty chawi a inhuam thu a sawi bawk a. Kan meeting-ah pawh hlim tlang takin kan inthlah niin kan lo inngai zawk a ni,” a ti.

Sawrkar hnathawk contribution tur chungchangah Health Minister chuan, “Sawrkar hnathawkte contribution tur hi an luh tirh (entry basic) atanga chhut a ni a, chu chu 1% vel bawr chauh a ni. Tuna an hlawh basic (existing basic) atanga chhut phei chuan 1% pawh a tling mang lo a ni a. Tin, hlawh pumpui, Gross salary atanga chhut phei chuan 0.5-0.75% vel bawr chauh a ni a, a bei tham hle,” tiin an rua-hmanna hi a sawi bawk.