Naupang talent zawn nan Tuichangral Championship hman a ni dawn tih Chief Minister in a sawi
East Lungdar Mini Sports Complex-a ‘Tuichangral Championship 2025’ hawnna ah hian Chief Minister chuan kum 1970 chho atanga lo kalpui tan tawh he intihsiakna hian ngaihhlut a hlawh thin thu leh ‘Tuichangral Games’ tia hriat thin a nih thu sawiin, “Infiamna ngaina tak in nih avangin infiammite pawhin an chhawr a. Mizoram in Olympian pahnih chauh kan la nei a, chuta pakhat zawk chu E. Lungdar chhuak, C. Lalremsanga, Archer a ni,” tiin tunhnaiah Professional Footballer engemawzat an chherchhuak tawh tih a sawi bawk a. Infiamna tam tak chu eizawnna tlak a nih tawh avangin a bei tak takte tan chuan hlawhtlin theihna leh ram leh hnam chawimawina a ni tih sawiin, “Vawiin a intihsiakna bei tura lo kal te zingah pawh talent nei tha, tih tak taka beitu tam tak in awmin ka ring. Theihtawp chhuahin, hlawhtlin ngei tumin bei ang che u,” a ti a. Sawrkar chuan naupang talent nei tha te zawnchhuah a, training tha tak pe a Olympic 2036-a India aiawh thei khawpa buatsaih an tum thu sawiin, “Kumin Tuichangral Championship pawh hi naupang talent zawn nan kan hmang dawn a ni,” a ti bawk.
He hunah hian Sports & Youth Services Department changtu Minister Lalnghinglova Hmar pawhin Tuichangral thalaite tana entawn tur, kum li chhunga E. Lungdar atanga Barcelona Olympic-a India aiawha inlan phak, Mizo Olympian hmasa ber C. Lalremsanga neitu an nih thu sawiin, “He bial-ah hian talent a awm tih kan hria a, kan rawn zawng zel a ni. Tunah hian Tuichangral Games buaipuituten Mizoram sawrkar an sawmlut a ni lo, sawrkar hian he Games-a rawn tel ve hi kan rawn dil zawk a ni. Naupang talent nei thate kan rawn zawng a, nakum ah pawh kan la rawn zawng leh ang. He Games-ah hian tawp mai tum lo ula, C. Lalremsanga anga Olympic khel thei nih lo tum ang che u,” tiin a chah bawk.
Tuichangral Championship 2025 hawnna hun hi TGSA Sr. Vice President Lalrengpuia Colney chuan kaihruaiin B. Lalnunthara, General Secretary chuan report a pe a,TGSA huamchhung ah hian khaw 33 awmin kumin hian khaw 17 an inlan dawn a. Football leh Volleyball (Mipa leh hmeichhia) bakah Men Badminton Single, Men Badminton Double, Women Badminton Single, Women Badminton Double, Men TT Single, Men TT Double, Women TT Single Women TT Double bakah Under -16 tan bik Boxing, Wrestling leh Weighlifting, a vaiin chi 15-ah inelna neih a ni dawn a, tun thla ni 9-ah zawhfel tura ruahman a ni.
Comments
Post a Comment