MZP in raltlan laka thu thehdarh vanduaithlak an ti

Mizo Zirlai Pawl (MZP) chuan tunhnai thil thleng hrang hrangah raltlante phih awhna tur dap a raltlante tih hmingchhiat nana thu thehdarh ching an awm chu vanduaithlak an tih thu sawiin, hei hian Zofate inpumkhatna leh inunauna a tichhia tih an sawi.

Nimin khan Aizawl-a MZP Pisapui-ah MZP General Headquarters Extended OB leh Adviser te chu thukhawmin Mizoram-a raltlante dinhmun an sawiho a, Myanmar leh Manipur buaina avanga Mizoram a raltlante Mizo mipuite'n duat taka an lo dawngsawng leh an tuamhlawm chu a Mizo ziain, Christian an nihna anga an tih tur dik tak an ti ah an ngai tih an sawi a, Mizoram chu Zofate Inpui a nih avangin Mizoram chhehvel a harsatna tawk ten pan berah an rawn chu Mizote vanneihna ah an ngai tih an sawi a ni.

MZP chuan Mizoram-ah raltlante an tam tawh avangin hnawk tihna tawngkam pawh a tam ta hle nia sawiin, Raltlante zingah thil tisual an awm chuan dan anga hrem thin turin thuneitute an ngen tih an sawi a. Chutih rualin engemaw hlekah raltlante phih awhna tur dapa, raltlante tih hmingchhiat nana thu thehdarh ching an awm fo chu vanduaithlak an tih thu sawiin, hei hian Zofate inpumkhatna leh in unauna a tichhia tih a sawi a. Raltlante enkawl dan leh chhawmdawlna mumal zawk a awm theih nan Mizoram sawrkar chuan dan mumal tak siam thuai se an duh thu pawh sawiin, hei hian Mizoram mipuite leh raltlante inkarah inhriatthiamna a siam an beisei thu an sawi bawk a ni.