Mipui sum heu zawnga AMC sum hmanna hmuchhuak

Director of Local Fund Audit in kum 2019-2020 leh kum 2022-2023 sawrkar kum chhunga Aizawl Municipal Corporation (AMC) sum hman dan a endikna-ah hek leh mipui sum heu zawnga pawisa tam tham tak hmanna a hmuchuak.

    Thudawnna in a tarlan danin Tuirial a bawlhhlawh paihna hmun - Solid Waste Management Centre (SWMC) siamna atan kum 2022-2023 chhung khan AMC hian mimal ta lei laihna khawl (JCB) hman manah cheng vbc. 1.26 vel a seng a. Director of Local Fund Audit on the Accounts of Local Authority report atanga a lan dan chuan AMC hian ama pualin JCB hi 3 an nei ve reng a, heng JCB pathum zinga pakhat phei chu SIPMIU hnen atanga an dawn a ni nghe nghe a. Heti chung hian bawlhhlawh sawngbawlna hmun tur laihna atan hian ni 255 chhungin cheng vbc. 1.26 thelh a seng a. JCB pathum zinga pahnih leina atana AMC senso hi cheng nuai 49 chuang hret chauh a nih laiin mimal JCB hmanga cheng vbc. 1.26 vel sen a ni hi an sum endiktu (auditor) te chuan a sum ren loh thlak hle-ah an ngai a. AMC chuan mimal JCB an hmanna chhan chu an JCB neih pathumte a chhiat lai a nih vang niin an sawi thung.