State 2 inbiakna April 25-ah neih a ni dawn

Mizoram leh Assam ramri buaina chinfel tuma sawrkar Official-te inbiakna chu tun thla ni 25 khian Guwahati-ah neih tura ruahmanna siam a ni.

Home Department atanga thudawn danin Mizoram sawrkar aiawhte hi Official 7 an ni anga, Home Secretary Vanlalmawia’n a ho ang. An ruahman dan chuan April ni 24-ah Aizawl chhuahsanin hemi ni veka Guwahati thlengin inbuatsaih nghal tum a ni a. Mizoram leh Assam Official-te inbiakna turah hian ramri buai chungchanga a hma lama lo sawi tawh leh State pahnih la inrem theih lohna te sawiho lehin kimchang taka thil awmdan inhrilh tawn tura ruahman a ni a. Official-te an inbiakna rah chhuah a zirin Mizoram Home Minister leh Assam Border Protection & Development Minister te a vawi ngana atana inbiakna chhunzawm tura ngaih a ni a. Tun tumah hian ni khat chauh inbiak phawt tur a ni a, thil awmdan a zirin Official-te inbiak chhunzawm leh rawt a ni mai thei bawk ni a thudawn a ni.

Tarlan tawh angin nikum August ni 9 khan Aizawl-ah State pahnih Minister te inbiakna chu neih a ni tawh a, kumin March ni 31 hma a inbiak chhunzawm leh tura tih chu an hman ta lova, Official-te inbe phawt se tiin thutlukna siam niin April 25-ah inbiakna hi neih a ni dawn a, sawrkar aiawh turte pawh tihfel a ni ta bawk a ni.