Kolasib Sub-Hqrs. YMA Rorel Inkhawm neih a ni

Kolasib Sub-Hqrs. YMA Rorel Inkhawm vawi 9-na chu nimin khan Bilkhawthlir-a LR Futsal Ground-ah neih niin thu pawimawh hrang hrang ngaithuah a ni.

Kolasib Sub-Hqrs. YMA Rorel Inkhawm hi an President Thomas D. Lalengliana chuan kaihruaiin YMA khawih an rel zingah 'Raltlan zinga mi in khaw tual (Mizoram mi) hmei-chhia nupui-a a neih a, Branch YMA ten kan lo dawnsawn dan tur chungchang tihchian ni rawh se' tih leh 'YMA ten khawhar In kan lenpuia lenglawng hla sak kan ching hi a hluar zel loh nan Central YMA in hma lain inkaihhruaina siam rawh se' tih te pass a ni.

Sawrkar khawih thil bikah- 'Rel lo lut tur kaihhnawih thilah Ram leh Hnam a him theih nan hmalak ni rawh se,' tih te; 'Kolasib Sub-Hqrs. YMA huamchhunga Thingzai khawl lian (Saw Mill) hnamdangin Mizo hming hawha an neih tihtawp a nih theih nan chak taka hmalak ni rawh se,' tih te; 'Mizoram leh Assam inrina a Border Police Outpost kawng, Saipum leh Aitlang te PCC flooring a siam a nih theih nan sawrkar in hma la rawh se,' tih te; 'Hnamdang/State dang motor lo lut thin ten Motor Registration plate an hliah khuh thin hi ti tawhlo turin hmalak ni rawh se,' tih leh 'Kolasib District Hospital tihhmasawn a, a nihna ang taka thuam a nih theihna turin chak taka hmalak ni rawh se,' tih te chu an pass bawk a ni.

Sub-Hqrs. YMA Secretary report atanga a lan danin, Kolasib Sub-Hqrs. YMA huamchhungah hian Group YMA 5 leh Kolasib Town Branch awmin, a vaiin YMA Branch 89 a awm a, member mipa 21142 leh hmeichhia 13131 awmin Member zawng zawng hi 34,273 an ni a. Kumthar 2026 Sub-Hqrs YMA rorel inkhawm chu Kolasib-ah nghah a ni a, kum 2025-2026 budget atan Rs 15,83,300.00 ruahman a ni bawk.