CADC in Union Minister hnenah ngenna lo thlen

Chakma Autonomous District Council (CADC) chuan Bangladesh ramri hung avanga In leh lo leh ram chante zangnadawmna sum pechhuak thuai turin sawrkar laipui an ngen.

Union Minister of State for Home Nityanand Rai hian niminpiah khan CADC tlawhin CADC hotute chuan hemi chungchang hi an lo thlen a, Bangladesh ramri hung avanga chhungkaw tam takin an In leh lo leh ram an chan avanga zangnadawmna atana cheng vbc. 118.75 pe tura Mizoram sawrkar kaltlanga Central sawrkara dilna an thehluh chu Home Ministry remtihna nghah mek a nih thu lo thlenin phalsak thuai turin an ngen a. Hei bakah hian hmasawnna hna thawk tura ruahmanna Project 47, kawng siam, zirna lam, sawrkar inrelbawlna, thiamthil lam hmasawnna leh hnam ziarang humhalhna atana an thehluhte tun thlenga pawmpui loh a la awm leh tihkhawtlai a ni chu pawi an tih thu leh heng project pawimawh te tihpuitlin theih lova a awm chu tha an tih loh thu an lo thlen bawk.

CADC thuneitute chuan an Council-in sum harsatna namen lo an tawh dan lo thlen bawkin kum 2021-2022 tangka kuma Council hnathawkte hlawh daih lova ruahman a nih avang khan 2024-2025 tangka kumah sum indaihlohna cheng vbc. 54.70 chuang a awm niin an sawi a, chu chu tun tangka kum tharah hian siamrem a ngai dawn niin an sawi a. Mizoram Finance Commission in Autonomous Council dang aiin CADC tan sum a ruahman tlem zawk chuan harsatna a siamsak niin an sawi bawk.

An sum harsatna, a bikin Council hnathawkte hlawh indaihlohna phuhrukna atan hian a bik taka pek turin cheng vbc. 70 an dil a. Union Minister hnena Memorandum an lo thehluhah chuan Council huamchhunga inkalpawhna kawng chhe lutukte, Mizoram puma ziak leh chhiar thiam za zela 91.58 a nih lai a za zela 46 chauh a nih thute, zirna sang zawk tlem lutuk leh hriselna lama an hniam bik ziate tarlangin, ramchhunga Autonomous District Council zingah CADC hi a hnufual ber niin an sawi.