YMA in Fimkhur Thla ah puang

Mizoram-a tlawmngai pawl lian ber, Young Mizo Association (YMA) chuan April thla hi rampum a ‘Fimkhur Thla’ atan a puang a, hemi denchhen hian a hnuaia Sub-Hqrs., Group leh Branch YMA te chu anmahni huamchhungah theuh hma la turin a ngen.
Central YMA-in ngenna an tihchhuahah chuan In hmun leh lei lai ten Furpui lo thlen hma a an lei laih te nghet taka lungrem/Concrete a tih ngheh hman nise tiin, Thal chhungin mitin in tuidawn leh tui paihna mumal taka siam a, tui chhe paihna te kawrpuiah tha taka luan luh tir ngei nise an tih bakah khaw tin/Veng tinin an huamchhunga lui leh kawr-te hnawhtu a awm leh awm loh leh a him tawk em tih en fel vek nise, a him tawk lova an hriat te chu thenfai ngei nise, a tul dan a zirin YMA hnatlang pawh koha tih that vek ni bawk se an ti. 

Heng bakah hian an huamchhunga lungrem leh culvert-te a him tawk leh him loh dan te enfel nise, a him tawk loh chuan tih that vat dan ngaihtuah nise; Thing zar leh thingzar ro tluk hlauh-awm te Forest Department hriattir emaw, then fai nise la, Kham/Kawngko sanga lung tla leh lei min mai thei a awm leh awm loh en fela, hlauhawm a awm chuan hma lak nghal nise an ti bawk. 

Lei tlahniam hlun leh min thinna hmun te chhiatna nasa zawk thleng thei turte uluk taka en fel tura chah bawkin, a tul anga invenna siam nise; Thlanmual a him em tih uluk taka en fel nise, a tul anga thlan chung pawh tui lut theilo tura Cement a zut phui vek nise an tih bakah Chenna In, fur ruahpui leh thli-ah a him dawn lova a lan chuan chhuahsan rih mai a tha an ti a, heng an tarlan ho a Branch YMA ten Fimkhurna Thla an hman dan chu Central YMA-ah thehlut leh turin an ngen a ni.