Vawiin Assembly-ah MLP Act siamthat sawiho dawn

Mzoram Legislative Assembly Budget Session chu Vawiin hian chhunzawm a ni leh dawn a, Excise & Narcotics Minister Lalnghinglova Hmar chuan ‘The Mizoram Liquor (Prohibition) Amendment Bill, 2025’ a pulut dawn a, Budget a tlangpui-a sawihona neih zui a ni ang.

Mizoram Legislative Assembly Budget Session hi ni thum chhung chawlh lailawk a nih hnuah Vawiin chawhma dar 10:30-ah chhunzawm a ni dawn a, hun hma lam darkar khat chu zawhna leh chhanna atan hman a nih hnuah MLP Act 2019 siam danglam rawtna Bill chu Excise Minister Lalnghinglova Hmar chuan a lulut anga, sawiho a ni ang.

Hemi chungchanga Excise & Narcotics Department lam atanga thu dawn danin, Mizoram-a thei, buh leh bal leh thlai tharchhuah atanga Wine leh Beer siamchhuah a nih theihna atan Mizoram-a Zu khapna Dan dinglai hi siamthat a her rem tum a ni. Mizoram tharchhuahah hian Grape chauh ni lo, Balhla, Lakhuihthei, Sawhthing, Dragon Fruit, Sapthei, Zobuh leh thildang Wine leh Beer siam theihna ang chi atanga siam phalna atan dan hi siam that tum a ni a. Mizoram thar atang chauhva siam theih tura ruahman a ni a. Hei hian Mizoram pawna Wine leh Beer siam lakluh phalna a huam dawn lo a ni.

Hetihlai hian Horticulture Minister Prof. Lalnilawma chuan Mizoram thei, buh leh bal leh thlai thar atanga ramdanga hralhchhuah (export) tlak tur Wine siamchhuak tura ruahmanna an kalpui thu February ni 28 khan a lo sawi tawh bawk a ni.

Vawiin-a Assembly thutkhawm ah hian kar kalta Thawhlehni a Finance changtu Chief Minister Lalduhoma'n Assembly-a a putluh, sawrkar kumthar a hman tur Mizoram budget (2025-2026) cheng vbc. 15,198 leh nuai 76 a tlangpuia sawihona chu neih zui a ni dawn a, sawihona hi ni hnih chhung neih a ni ang.