Sawrkar in PAHOSS kalpui chhunzawm a tum lo

UD&PA Minister K. Sapdanga chuan sawrkar hmasain an kalpui Parking House Support Scheme (PAHOSS) chu kalpui chhunzawm tum a nih loh thu Assembly House a hrilh.

    Nimin a Assembly inkhawm zawhna leh chhanna hunah UD&PA Department changtu Minister K. Sapdanga chuan PAHOSS atana Mizoram sawrkar sum sen zat chungchanga ZPM Member VL. Zaithanzama zawhna chhangin, “PAHOSS atana Mizoram sawrkar sum senral zat chu cheng nuai 1,136.4 a ni,” tiin Sawrkar hmasa-in Parking House Support Scheme (PAHOSS) a kalpui chu chhunzawm tum a ni lo tih a sawi a. ZPM Member T Lalhlimpuia zawhna chhangin K. Sapdanga chuan Lunglei Municipal Council tan Draft Rules siam a awm chiah lo tih sawiin, “Regulations erawh chu Cabinet-in pathum a pawm tawh,” a ti a, LMC tan hian Draft Regulations pakhat Cabinet approved la lak loh a awm thu a sawi bawk. UDPA Minister sawi danin, Cabinet-in LMC tana regulation a pawm tawhte chu - The LMC (Control of Parking Collection of Parking Fees) Regulations, 2024; The LMC (Display of Advertisment & Hoarding) Regulations, 2024 leh The LMC Licensing Regulations, 2024 te an ni a. Cabinet-in a la pawm loh chu The LMC Building Regulations, 2025 niin, pawm a la nih loh chhan chu department chhungah zirchianna neih leh mek a ni a. Siamthat ngaite siamthat a nih hnuah Cabinet pawmpui turin thawn a ni ang.