Serchhip District-ah ruihhlo do hna thawktu ten chak zawka ruihhlo do dan tur an sawiho

Serchhip District-a chak zawka Ruihhlo do dan tur sawihona chu nimin khan Bawrhsap Paul L. Khuma hovin neih a ni.
He sawihona Serchhip DC Meeting Hall-a neih ah hian Serchhip District Nasha Mukt Bharat Abhiyan (NMBA), NCORD leh Task Force on Ruihhlo Do Committee Member te an tel a, thutkhawm kaihruaitu Bawrhsap Paul L. Khuma chuan inhmuhkhawm an neih chhan sawiin NMBA, NCORD leh Task Force te chu tum thuhmun an nih avangin inpawh tlang taka hna an thawhho chuan sawt zawka ruihhlo do a beiseiawm tih a sawi a. Demand, Supply leh Harm Reduction te chu an thil tum bulpui ber a nih thu a sawi bawk.

Nimin-a thutkhawm ah hian heng Committee peng hrang hrang pathum te hian an hmalakna theuh tarlangin, Ruihhlo la ti ngai lo ten an tihchhin lohna tur te, a la ti mek ten an sim theihna tur te a zirtirna an kalpui dan ngaihthlak a ni a. Heng Committee peng hrang hrang te hian Serchhip District chhunga khaw hrang hrangah vak chhuakin zirna sikul, Sunday School, College leh YMA Chhang te zingah Awareness Campaign hi hmun hrang hrangah an nei thin a ni.

Heng bakah hian Excise and Narcotics, Police, Assam Rifles leh BSF te hnen atangin report ngaihthlak a ni bawk a. END te hian kum 2025 chhung hian NDPS Act hnuaiah Case paruk an ziaklut hman a ni. Ruihhlo tawlhruk leh zawrh chungchanga report hrang hrang inhrilhriat tawnna, Intelligence Sharing neih dan rel a ni a. Heng Force te bakah hian tlawmngai pawl YMA te pawhin an thudawn te awlsam taka an report zung zung theih dan tur ruahmanna siam a ni a. Force tinah information pekna atana biakpawh bik tur mi thlanchhuah nise, mipui pawhin Police-ah emaw, Excise lamah an report theihna turin phone number tarlanga hriattirna tihchhuah chungchang te pawh an rel a ni. Tlawmngai pawl leh Force te thawhhona Ruihhlo Do Squad pawh titawp mai lova chhunzawm zel tha an ti a, a theih anga tam duty ho nise tiin an rel bawk a ni.

He thutkhawm ah hian Tleirawl zinga prescription drug hluar chungchang sawilan niin Drug Inspector te hmalakna ngaihthlak a ni a. Schedule H Drug License nei te chu an dawr-ah CCTV vuah theuh tura thupek an nih angin Serchhip District-ah hetiang license kawl dawr 30 zingah 28-in CCTV an vuah tawh a. Schedule H Drug hnuaia prescription drug te hi dan lo anga pechhuak an awm tih hriat a nih chuan an bawhzui nghal thin thu leh chutiang hria an awm chuan report thin turin an ngen a ni.