Serchhip-ah Walk for Health Walkathon neih a ni

Mizoram sawrkar Health & Family Welfare Department hnuaia Mizoram Health Systems Strengthening Project (MHSSP) hmalakna hnuaiah nimin khan Serchhip khawpuiah hriselna atana kea kal runpui, ‘Walk for Health Walkathon 2025’ neih a ni.

Walk for Health Walkathon hi Serchhip-a hmun hnih atanga tanin Team khatna hi Serchhip Bazar Traffic Point atangin an kal tan a. Team hnihna hian New Serchhip College peng atangin bul an tan thung a. Leisekawt Mual-ah intawkkhawmin hetah hian hun hman zui a ni.

Leisekawt Mual-a hun hman ah hian Ser-chhip Bawrhsap Paul L.Khuma chuan hriselna atana ke-a kal a pawimawh zia a sawi a. Natna chi hrang hrang - Cancer, BP sang, Stroke, Heart Attack, Diabetes te leh natna dang tam tak hi taksa insawizawi avangin a pumpelh theih tih a sawi a. Walkathon a tel te fuihin taksa leh rilru hrisel kan lo neih theih nan taksa insawizawi, ei leh in a fim-khur leh mahni inthun theih pawimawhzia hria a, a taka nunpuitu ni tur leh midang te zirtir chhawngtu nih theuh tum turin a chah a ni.

Walk for Health Walkathon-ah hian mi 700 chuang an tel a. School naupang, YMA, MHIP, MJA, Govt. Serchhip College leh DIET zirlaite bakah Health Department leh Serchhip khawpui chhunga sawrkar Department hrang hranga thawktute an tel a. World Bank Consultant Philip Kumar pawh Serchhip khawpuia Walkathon ah hian a tel a. A kharna hunah hian Sr. CMO Dr. LP. Malsawma chuan Walk for Health Walkathon 2025 neih a nih chhan sawiin, hriselna atana ke a kal tam chu nunphunga neih tum turin kalkhawm te a chah a ni.

He hunah hian hian Badminton National Under-17 Double Ranking a No.1 hauh mektu Malsawmhlua chuan fuihna thu a sawi a. Zaithiam zai te ngaihthlak niin Dr. Beth VL Nuntluangi, DHQM, Serchhip chuan lawmthu sawina hun a hmang bawk a ni.