Serchhip Town chhunga VC te nen Serchhip khawpui cheimawi dan tur sawiho

Serchhip khawpui cheimawina tura ruahmanna hrang hrangte thlirin nimin khan Serchhip Bawrhsap Paul L. Khuma hovin Serchhip Town chhunga Village Council Member te chu an thukhawm a, Village Council te pawhin theihtawp chhuahpui an inhuam thu an sawi a ni.

Nimin a thutkhawm Serchhip DC Meeting Hall-a neih ah hian Serchhip Beautification Committee Chairman leh bawrhsap Paul L. Khuma chuan Mizoram sawrkar in khawpui hrang hrang cheimawi a nih theihna tura hma a lakna leh Serchhip-ah pawh hemi atana hmalakna hrang hrang kalpui a nih thu a sawi a, Serchhip khawpui cheimawina tura heng an ruahmanna te hi VC te leh mipui tawiawmna tel lo chuan a hlawhchham dawn tih sawiin, thawhhopuiah a sawm a ni.

He thutkhawm ah hian Addl. DC Lalrinzuala chuan Serchhip cheimawi dan tur ruahmanna, Serchhip Beautification Project nihphung chu kalkhawmte hmaah a sawifiah a. Hmun thlan bik 28-ah a hmunhma pangpar leh thil dang hmanga cheimawi - Landscaping te, Serchhip Bazar-ah Air Quality Monitoring Board hun te, Khawtetlang-a Community Garden siam te, New Serchhip North leh Serchhip Bazar-a fountain siam te, hmun hrang hrang thlanchhuahah chhinchhiahna - Signage siam te, kawngpui kam cheina tura thingphun belh te, mi a duh apiang dana thut muan theihna tur leh cheimawina tura hmun thlan chhuaha thutthleng - Park Bench hun te, 2D leh 3D Painting dah te he project ah hian a tel a ni.

Hei bakah hian Serchhip khawpui dung - Main Spine tluana electric ban te leh hrui hnawk lutuk te a theih anga chinfel te, Serchhip Bazar a thilzuar-a inpho thin - Hawker te thutna leh a chhehvel te pawh mumal leh felfai zawka chhinchhiah a, Hawker Zone siam tum a ni bawk.

Nimin-a thutkhawm ah hian Serchhip khawpui chhunga Village Council zawng zawngte tel tura sawm niin Town chhunga VC 14 aiawhte an tel a, he hunah hian Beautification Plan hi uluk taka sawiho a ni a, he huna tel Village Council member te hian Serchhip khawpui chei mawina tura theihtawp chhuahpui an inhuam thu an sawi a a, an ngaih pawimawh hrang hrangte pawh an sawi bawk a ni.

Nimin thutkhawm ah hian sawrkar lam atangin DC leh Addl. DC bakah DUDO Gaston Vanlalhriatpuia leh SDC Dr. Marilyn Lalruatkimi te pawh an tel bawk a ni.