Hmar Veng VC-a Congress sawrkar lawmna neih a ni

Serchhip Hmar Veng Village Council-a Congress VC lawmna chu nimin khan neih a ni a, MPCC President Lal Thanzara chuan a hmanpui a ni.

Serchhip Hmar Veng YMA Hall-a he hun hmanna ah hian MPCC President Lal Thanzara chuan Serchhip Bialtu MLA chu sawrkar loh laiin he Bial-ah hian MLA a ni tawh tih sawiin, “He Bial leh abik takin Serchhip leh Thenzawl khua tan phei chuan thutiam leh malsawmna thlen a tum te a sawi nasa hle. Mahse tihlawtling thei dinhmun CM meuh anih hnu hian a thil tiam tih puitlin chu sawi loh, hmalakna hmuh tur a awm mang lo,” tiin Pathian leh mipui te zarah sawrkarna an chang leh anih chuan kutkhathawktute an ngaipawimawh ber ang a, NLUP hmangin rethei te an khaichhuak ang tih a sawi bawk.

Serchhip Hmar Veng VC-ah hian Seat 5 awmin VC Inthlanpui neih zawh takah khan Congress Party chuan Seat 3 lain sawrkar an siam a ni.