Contractor hna neih theih zat bituk chhan hna tha tawk lo a awm loh nana tih a ni tih sawi

PWD changtu Minister Vanlalhlana chuan sawrkar tharah Contractor hnathawh theih tur zat bituk a nih chhan chu Contractor pakhatin hna a thawh hnem lutuk vanga hna tha tawk lo a awm loh nan a nih thu sawiin, thil dik lo chu a mawhphurtute hrilhriat zel tha a tih thu House a hrilh bawk.

Mizoram Legislative Assembly thutkhawm nimin-a chhunzawm ah MNF Member Robert Romawia Royte chuan Contractor-te hnathawh zat tur bituk a nih thu sawiin, “Panga bak an thawk thei lo ang tih a awm. Contractor-in hna panga an neih chuan an chhang thei lo zel dawn. Tin, 5% aia hniama chhangte pawm a ni lo tih a awm,” tiin hetianga ruahmanna siam a nih chhan a zat a. PWD Minister chuan Contractor hnathawh theih tur zat bituk a nih chhan chu Contractor pakhatin hna a thawh hnem lutuk vanga hna tha tawk lo a awm loh nan a nih thu a sawi a. Contract hna chhanna ah zaa 5 aia hniam a chhan chu hna in a tawrh phah thei tih sawiin, “Hna in a tawrh ai chuan i rek bung mai ang sawrkarin a ti. A chhanna a in an chuan dan angin a thawk tur kan thlang mai zel,” a ti a, channa inang an awm pawhin a thawk lo zawkin sawisel an neih ngai loh thu a sawi.

PWD Minister chuan National Highway 44A siam hna thawktu, Contractor hmasa M/s Gayatri Projects Ltd. te chu an hna a muan lutuk avangin an ban thu leh hnathawhna tura pawisa bang cheng vbc. 199.07 thawk chhunzawm turin tender an ko tih a sawi a, hei hi chhangtu an tlem avangin cancel a nih thu sawiin, March thla chhungin Tender koh leh an tum dawn tih a sawi a, thla hmasaa Union Minister of State for Road Transport & Highways and Corporate Affairs, Harsh Malhotra-a'n Mizorama a rawn tlawh tum khan NH-44 A One Time Improvement By-pass Road chu tun thla chhung ngeiin bawhzui a nih tur thu a hrilh niin a sawi bawk. Hei bakah hian Minister chuan Mizoram leh Tripura inkalpawhna kawngpui pawimawh tak, Tuipuibari to New Kawnpui, Tripura chu KM 9 khawih tawh a ni tih a sawi a, a bak khawih chhun-zawm a la nilo tih a sawi bawk.

MNF Member Rasik Mohan Chakma chuan a bial chhungah hna estimate anga thawh ni lo, amah ngei pawhin a hmuna a hmuh a awm thu a sawi chungchangah PWD Minister chuan, “Tunlaiah mobile phone kan keng vek a, thil dik lo chu thla la ila, a mawhphurtu hrilh zel ang u. Kan ram tan kan tang tlang dawn tihna a ni,” a ti bawk.