Nikum chhungin KTP Member boral-ah mipa an tam

Kristian Thalai Pawl (KTP) Report-a a lan danin, kum 2024 chhung khan KTP Member 615 an thi a, chung zinga za zela 87.96% chu mipa niin kum 2024 chhunga thi zat hi kum hmasa 2023 aiin mi 63-in an tam zawk.

Nimin Pathianni hmang khan KTP Rorel Inkhawm vawi 11-na chu Aizawl Chawnpui Presbyterian Kohhran Biak In-ah neih a ni a, he huna tarlan a nih danin kum 2024 chhunga KTP member thi 615 zinga 541 (87.96%) chu mipa an ni a, mi 74 chu hmeichhia niin, thi zawng zawng atangin 12.04% an ni. Kum 2024 chhunga KTP member thi tamna ber Bial chu Republic Veng Bial niin mi 13, Mipa 10 leh Hmeichhia 3 an thi a; mi 12 thi awmna Champhai Vengthlang Bial leh Ramhlun North Bial ten an dawt a ni. Hetihlai hian KTP Member thi awm lohna Pastor Bial 62 a awm bawk.

KTP Rorel Inkhawm hi Zirtawpni zan khan Palai lawmna inkhawm atan hmangin General Secretary report, Finance Report leh Bial Report khaikhawmna ngaihthlak a ni a, KTP Kumpuan hawn leh hlanna hun hman a ni bawk. Inrinni khan Rorel inkhawm neih niin kum 2026-27 Kumpuan Thupui atan ‘Chhungril Takna’ an thlang a. An thurel zingah Bial tinah Youth Recreation Centre (YRC) pual Budget siam leh te, Hospital Charity Fund Pual, YRC Pual leh Chhawm-dawlna pualin Inkhawm Thawhlawm lak te leh ruihhlo do chhunzawm te a tel a, khawlai rawng-bawlna chu kalpui zui zel tura tih a ni bawk a.  Inrinni zan atang khan Vantlang Pathian biak in-khawm neiin nimin nileng-a inkhawm neih a nih hnuah nizan khan a tiak a ni.

Report atanga a lan danin tun dinhmun ah KTP hi Pastor Bial 223-ah Branch 907 a awm mek a, Member 1,77,548 awmin, heng te hi mipa 1,07,535 leh hmeichhia 70,013 an ni a. KTP Rorel Inkhawm vawi 12-na chu kum 2017 khian Kulikawn Kohhran-in a thleng dawn a ni.