Ni 20, February/Ramtuk Thla, 2025
Ni 20, February/Ramtuk Thla, 2025
- Zion Lalremruata
Ram leh hnam hrang hrang leh mi tinte hian Ni pawimawh bîk kan nei \hîn a, kan hriat angin Ni 20, February hi Mizoram State Day a ni a, Ni pawimawh bîk a ni. Kumin ah chuan he Nî hi Lammual-ah State Day of Prayer hmanga hun buatsaih niin thusawi \ha tak takte bakah Pathian chawimawia lamte leh \hahnem ngai taka \awng\ai hmuh tur a awm a: a lawmawmin thla an ti muang e.
Mizorama sum chang thlai zînga chin nasat ber chu Sawhthing a ni a, kan State politics pawh a luah hneh hle mai; a bîkin ZPM kaihhruai Sawrkar a pian hnû hian. Sawhthing hi kuthnathawktuten man man taka an hralh kum a awm fova, chutihrualin, a man \hat loh kum a thlen vêk vêk chuan kum tluana chawh loh chângte pawh a awm fo bawk, he harsatna hi a chhan ah chuan India ram chhûnga State engemaw zahten an chîn vâng a ni. Sawhthing hralhna/market a harsatna lian ber erawh chu Bagha, Silchar, Karimganj Syndicate ho in kan ram chhunga Sawhthing market an thunun hi a ni, he kawlpui ata talchhuah hlan nghakhlel taka thlirtu Kuthnathawktute an va khawngaihthlak \hîn êm.
Kan hriat tlân angin Ni 20, February/ Ramtuk Thla, 2025-ah Zoram mipuiten nghakhlel taka kan lo thlîr \hin ZPM intiamna, Manifesto-ah pawh an ziah ngei Sawhthing chu Rs.50/Kg in a lei \an ta! Chief Minister Pu Lalduhoma’n hun rei taka lo tlangau pui \hin chu a takin kan hmu ta, hemi kawngah hian Pu PC.Vanlalruata, Minister Agri te, Dr. K.C. Lalmalsawmzauva, Adviser to CM te leh Mizoram Agriculture Marketing Board Member (MAMB) te bakah District Agriculture Marketing Committee (DAMC) an thawkrim hle a ni (Ka vei ve ber a nih vangin an in buatsaih dan hi uluk takin ka zir a, an in buatsaihna pawh a \ha). Thutiam a ding ngam Kalphung Thar Sawrkar an fakawm a, Ni 20, Ramtuk Thla (20/02) hi Ni BÎK leh chhinchhiah tlâk tak a ni zêl tawh ang.
Sawhthing hi chu a tuiin chhungkaw tin mamawh a ni bawk a politics pawh a nghawng sam viau a, Social Media ka han en a Opposition Party mi leh saten Kuthnathawktute Sawhthing Sawrkar in a leisak chu lawmpui ahnêkin, a ni lo zawngin thu mak pui pui an post nasa ngang mai a. He an thu post ho avang hian Kuthnathawktu tam tak an chiai phah a ni tih zan lamah te min lo hrilh hlawm a, hetiang thil hi chu thleng nawn tawh lo hram se ava duhawm em! Tin, Budget Session ni 21/2/2025 ah MNF MLA ten Mizoram Sawrkar chu Kuthnathawktute sawhthing man batsak ah an han puh leh bawk a, MIP hunlai a Aieng chi Kuthnathawktute an leisakna man thla 2/3 an batsak te, hman ni lawka Sialhawk khaw Lakhuihthei man kum 1 zet an batsak te kha a la rei vak lo a nia. Kuthnathawktute hian a sur a sa hnuaiah kawng bumboh tak tak zawhin RISK tak meuhin hma an la \hîn a, harsatna siam belh zâwnga khawsak hi chu a mawi lo e.
Awle, kan hriat angin Agriculture Marketing lamah hian hnuhma chhuanawm hnutchhiahtu Sawrkar kan la neih loh vangin dap chawp ngai thil a awm nual thei a; Sawrkar (MAMB) thu leh hla kan ngaihven peih a \ul dawn hle a ni. Ni 20, February/Ramtuk Thla, 2025 hi a bul\anna a ni tih hriain duhthusamin thil kalpui theih a ni kher lo thei tih hriat lawk a \ha âwm e. Kuthnathawktute pawn kan Sawhthingte fai tak leh thianghlim taka buatsaihin rinawmna nen hma lam I pan zel ang u. Tunlai khawvelah sumdawnna kawngah pawh hian inelna a sang tawh em em a, chuvangin, kan Sawhthing leitu turte lungawina ngei turin uluk takin kan thil tharchhuahte kan buatsaih a ngai a ni.