Mizoram State University din tur Clustered University kalphunga din tum mek a ni

Higher & Technical Education Minister Dr. Vanlalthlana hovin Mizoram State University din tura hmalakna te chu Zirtawpni khan thlirho a ni a, Mizoram State University hi Clustered University kalphunga din turin hmalak mek a ni.

Mizoram State University din tur chungchanga thutkhawm hi H&TE Minister Pisa-ah neih a ni a, tunhnaia Champhai leh Lunglei atanga NGO Co-ordination Committee ve ve ten Lunglei leh Champhai-a Mizoram State University dah an dilna chu awm an tihpui rualin, Sawrkar sum dinhmun a that tawk loh avangin Campus zau tak nei a din chu thil tih theih a ni dawn lo a ngaih a nih avangin State thenkhat kalpui dan angin College neih sa te hmang tangkaiin Mizoram State University chu sawikhawmin, Clustered University kalphunga din turin Mizoram Sawrkar chuan hma a la ta tih tarlan a ni a. NEP 2020 duh dan angin State University chu Multidisciplinary-a kal a ngaih avangin College engemaw zat chu sawikhawm (cluster) tum niin, Resource neih sa inhmantawm theih chu inhmantawm tura ruahmanna siam a ni.

He huna tarlan a nih danin NEP 2020-in a phut angin Central University-te chu kum 2035 atangin Research-Intensive University a nih a tul tawh dawn a, Central University-ten Degree an pek tawh dawn loh avangin State University-ten an pek a ngai tawh dawn a, chumi tur chuan Mizoram in State University a neih ngei a ngaih tawh thu sawilan a ni bawk a, hei vang hian Mizoram University din tura hmala turin Mizoram State University Bill, 2025 chu Assembly Session neih mekah thehluh a nih thu sawilan a ni bawk.

He hunah hian Minister Lalrinpuii bakah Lunglei North bialtu MLA V. Malsawmtluanga; Lunglei South bialtu MLA Lalramliana (Papuia), Champhai North bialtu MLA, Er. Ginzalala bakah Higher & Technical Education Department Officer-te an tel a ni.