Malaria tam zualna ah Mizoram a la tel tih sawi

Health Department hnuaia National Center for Vector Borne Diseases Control (NCVBDC) hotute chuan India ram pumah Mizoram leh Tripura chu Malaria la tam zualna a nih thu an sawi.

Health Department hotute sawi danin Mizoram leh Tripura tih loh India ram state dang ah chuan Malaria chu an thunun hneh viau tawh thu an sawi a. Mizoram chhungah pawh Malaria chu a ziaawm tawh hle thu sawiin, Mamit, Lunglei, Lawngtlai leh Siaha District te chu Malaria awm tam zualna a la nih thu an sawi a. Heng District-ah te hian a la tam deuh avangin Mizoram dinhmun pawh a la chhiat phah rih thu an sawi a. District dang zawng zawngah chuan Malaria tihbo kawnga sawrkar laipuiin a rawn beisei ang an phak thuak tawh thu an sawi a ni. 

NCVBDC hotute chuan Malaria chu India ramin kum 1950 chho atangin a lo do tawh tih sawiin, Malaria umbo tuma hmalakna chu a upa tawh hle tih an sawi a. Sawrkar laipui chuan kum 5 te te in Malaria umbo hna a kalpui thin thu leh kum 5 zel tih chu a tawk ta lo tih a hriat hnuah kum 2016 atangin kum 15 daih Malaria tibo tura beihpuithlakna tur, National Framework for Malaria Elimination a siamchhuak tih an sawi a. Kum 15 chhunga mar taka tanga Malaria um bo ngei ngei turin an rawn beisei thu an sawi a ni. NCVBDC hotute chuan Malaria chu Mizoram hmai balhna a nih theih dawn avangin tan lak nasat a ngaih thu an sawi a. Mipuite chu a thawktute ziritirna ngaipawimawh tur leh an thil sem damdawi hrang hrang te thuawih taka mithiamin a hun bi an sawi anga ei thin turin an chah a ni.