International Women’s Day lawmna leh Zakapa Award semna hun hman a ni

Mizoram sawrkar Women & Child Development buatsaihin International Women’s Day Lawmna leh Zakapa Award semna hun chu nimin khan neih a ni.

Dawrpui Multipurpose Centre, Aizawl-a he hun hman hi SWTA&WCD Minister Lalrinpuii chuan khuallian nia hmanpuiin NITI Ayog-in Sustainable Development Goal Index a tihchhuah enin hmeichhiate dinhmun tehfung awmna SDG 4 te en chuan Mizo hmeichhiate dinhmun chawisan kawngah hmabak thui tak a la awm thu a tarlang a. Hemi kawnga hmasawn tur hian chhungtin a mipa leh hmeichhia tanrualna a pawimawh thu a sawi a. International Women’s Day lawmna pual a Mizo Lal huaisen, hmeichhiate humhimna kawnga thawhhlawk tak, Zakapa hming chawi a Award siam leh hemi kawnga lawman hrang hrang buatsaih dawng thei tura hmeichhiate dinhmun chawisan kawng a hmalatute chu lawmpuina leh duhsakna a hlan a, he Award hian hmeichhe dinhmin tih hmasawn leh chawisanna kawngah awmzia thui tak a neih ngei a beisei thu a sawi bawk a ni.

Nimin-a he hun hman hi SWTA & WCD-a Commissioner & Secretary Lalzarmawii IAS chuan kaihruaiin MLA pahnih Baryl Vanneihsangi leh Prova Chakma te chuan khual zahawm niin an hmanpui a, he hunah hian Mizo hmeichhia, Local Council-a Term 3 (2015, 2020 leh 2025) a lo tling zawn tawh te, Sports lam a Mizo hmeichhiate hming tithatu mi 8 te, kum 2021 - 2024 inkar a STEM (Science, Technology, Engineering, Mathematics) Education-a titha hmeichhia College Topper mi 3, Mizo hmeichhiate zinga a hmasa ber nihna hauhtu mi 5 bakah sumdawnna lama anmahni thiamna hmanga eizawnna bul tantu mi 2, an vaiin hmeichhia 33 hnenah chawimawina leh lawmpuina hlan a ni.

He hunah hian Zakapa Award chu Aizawl Khatla South-a cheng Khawlrinpuii hnenah hlan a ni a. Award dawngtu Khawlrinpuii hi February 14, 1959 khan Arte khuaah lo piangin, a fate nen Khatla South-ah hian an cheng mek a. He huna tarlan a nih danin lehkah zir sang lo mah se, hmeichhia leh naupangte humhalhna kawngah theihtawp chhuahin hma a la thin a, hetiang lam hawi training ATI-in an buatsaih ah te pawh a tel hram hram thin a ni. Thenawm khawveng ah nupa buai te, fa inchuh te leh harsatna dang a awm pawh a an koh ber a ni thin a, hmeichhia humsual dai Home-a dah ngai buaipui te, naupang Home-a dah te leh a tul dan anga FIR thehluh te leh midangte himna tura Child Welfare Committee, Women Commission leh Home hrang hrang tlawh te chu a hnathawh langsar deuh deuhte an ni a. Heng a hnathawh that avang hian MHIP Khatla leh MHIP Gen. Hqrs. te pawhin chawimawina an lo hlan tawh bawk a ni.