ZORO in Social Media a thu thehdarh pawi ti

Zo Re-Unification Organisation (ZORO) chuan Zofate inpumkhatna kawng dal thei leh kan in unauna tichhe zawnga Social Media lama thusawi leh thuchhuah thin an awm chu pawi an tih thu an sawi.

    Nimin-a thuchhuah an siamah ZORO chuan, ZORO chu khawvel ram hrang hrang (India, Myanmar, Bangladesh) awm Zofa, thendarh a awm tawhte Chin Lushai Conference rorel dungzui a kan insuihkhawm leha rorelna pakhat hnuaia kan awm lehna tura hma la turin din a ni tih an sawi a. “Zofate kan inpumkhat theihna tur leh kan hnam in dikna chanvo kan neih ve theihna tura a tul ang zela hmalatu a ni a. ZORO chu a dinna ngaiah a ding reng a, tharum thawhna tel lova dikna chanvo kan chan theuh theihna turin Chin Lushai Conference 1892 Thurolum No.1 dungzui leh United Nation Declaration on the Rights of Indigenous People (UNDRIP) 2007 in a sawi angin India, Bangladesh leh Myanmar Sawrkar awpna hnuaia awm mek Zofate chu rorelna pakhat hnuaia awm turin hma a la zel ang,” tiin a tawp thlengin kan dikna chanvo kan hmuh hma chu kan hnam tan, kan ram tan a ding zel dawn tih an sawi. ZORO chuan tunhnaiah Zofa ten inpumkhatna kawng kan zawh mek laia Zofate inpumkhatna kawng dal thei leh kan in unauna tichhe zawnga Social Media lama thusawi leh thuchhuah thin an awm chu pawi an tih thu sawiin, hetiang ti thin te chuan kan hnam tan nghawng tha lo tak thlen chhunzawm thei thil a nih avangin lo fimkhur a, Social Media hmanga inbeihtawnna thuchhuah emaw, Video lo siam tawh lo turin mi tin an ngen tih an sawi a. “ZORO chuan khawvel hmun hrang hranga Zofate kan inpumkhat a, kan insuihkawm lehna turin hma a la zel dawn a ni,” an ti bawk.