Mizoram sawrkar in leiba vbc. 12082.26 a nei mek

Finance Department changtu Chief Minister Lalduhoma'n tun dinhmunah Mizoram sawrkarin leiba cheng vbc. 12082 leh nuai 26 a neih thu a sawi a, nikum tun ang hun nen khaikhinin tun Financial Year kal meka leiba chu cheng vbc. sang chuangin a tlahniam tih House a hrilh.

Nimin-a Assembly Session zawhna leh chhanna huna Siaha bialtu MLA Dr. K. Beichhua zawhna chhangin Chief Minister Lalduhoma chuan, tun dinhmuna Mizoram Sawrkar-in leiba a neih zat chu cheng vbc. 12,082 leh nuai 26 a ni tih a sawi a. Ba an neihna te chu Market Borrowings atangin cheng vbc 5871 leh nuai 41; sawrkar laipui atanga loan an lak atangin cheng vbc 1774 leh nuai 36; NSSF atangin cheng vbc. 102 leh nuai 82; Financial Institution leh Bank hrang hrang atangin cheng vbc. 954 leh nuai 87 leh Public Accounts Liabilities atangin cheng vbc. 3378 leh nuai 80 a nih thu a sawi a. Nikum tun ang hun nen khaikhinin kum 2024-25 Financial kal meka Mizoram Budget Estimate aiin Revised Estimate chu cheng vbc. 1003 leh nuai 94 in a tlem zawk tih sawiin, nikum aiin tun financial year-ah leibat zat chu cheng vbc. sang chuangin an tlahniam tih House a hrilh a ni.

Chief Minister chuan sawrkar hnathawk MR bill te chungchang pawh sawiin, lut reng leh chhuak reng a nih thu leh tunah hian engmaw zat ba an la neih thu a sawi a, amaherawh chu an dawn tawh chin chu tun Financial Year tawp hma in an clear vek dawn tih a sawi a. GPF chu tunhma ang a ni tawh lo tih sawiin, an buai tak loh viau thu leh a tlangpuiin an pe thei deuh zel tih a sawi a. “An dil reng a, kan pechhuak reng a, kan clear vek tih theih dinhmun ah chuan a ding chiah lo a ni,” a ti a. Hetiang bawk hian Pensioner te pawh pension benefit tihfel loh a lo tam thu leh tunah hi chuan an pe thei deuh zel tih a sawi a, lut reng leh chhuak reng, thla tin-a dilna lut reng a nih avangin clear vek tih theih a ni lo tih a sawi bawk.