Serchhip District-ah ‘Road Safety Month’ hawngin kum 2020 hnuah lirthei chesual avangin mi 30 an thi tawh
Serchhip DC Pisapui Hall-a ‘Road Safety Month’ hawnna hun hi Serchhip District Bawrhsap Paul L. Khuma chuan khuallian hmanpuiin mihring nunna hlutzia leh mahni nunna kan hlut ang bawkin mi dangte nunna pawh kan ngaihlu tur a ni tih a sawi a. Lirthei khalh fimkhur loh avangin mahni leh midang tan chhiatna rapthlak a thleng thei a ni tih hriaa Road Safety Month den-chhenin lirthei fimkhur taka khalh a tulzia hre thar leh turin mipuite chu a chah a. Lirthei khalh chak lutuk te, rui chunga lirthei khalh te, helmet leh seat belt vuah loa lirthei khalh te, Mobile Phone hmet paha lirthei khalh te leh traffic dan bawhchhiatna te chu lirthei chetsualna thlentu langsar zual panga an ni tih sawiin, khawvel pumah kumtin Mizoram a cheng zawng zawng zat vel nunna suat thintu lirthei chetsualna kan pumpelh theih nan fimkhur taka lirthei khalh thin tur leh mi dangte zirtirtu Ambassador ni theuh turin kalkhawmte a chah a ni.
Serchhip-a ‘Road Safety Month’ hawnna hun hi Serchhip DTO Vanlaldika chuan kaihruaiin Addl. SP Saidingliana Sailo leh MVI H. Lalrohlua ten Traffic Rules zawm pawimawhna leh Vehicle Insurance chungchang sawifiahna hun an hmang a. Kalkhawm ten Road Safety thutiam an sawi rual bawk a ni.
Serchhip Police ten an chhinchhiah danin kum 2020 atanga kumin (2025) January chhungin Serchhip District-ah lirthei chetsualna tum 30 lai thlengin heng te hi Two Wheeler accident vawi 8, Three Wheeler vawi khat, LMV vawi 11, Truck accident vawi 9 te a ni a. Heng accident avanga nunna chan hi mi 30 awm tawhin hliam tuar mi 33 an awm bawk a ni. Mizoram State Road Safety Council chuan kumin hian February thla pumpui hi Road Safety Month atan hman a rel angin he hun hi Mizoram pumah hman mek a ni.