Serchhip-ah Kangmei Ven Hapta hman dan tur rel

District Level Committee on Fire Prevention chu nimin khan Serchhip-ah thukhawmin kumin a kangmei ven Hapta hman dan tur hrang hrang an sawiho.

Serchhip DC Meeting Hall-a District Level Committee on Fire Prevention thutkhawm hi an Chairman leh Bawrhsap Paul L. Khuma chuan kaihruaiin State Level Committee on Fire Prevention, 2025 thutkhawma an lo rel tawh angin Fire Prevention Week chu February ni 10 atanga 15 chhung hian hman leh tu a ni a. Serchhip District-ah a hawnna inkhawm chu February ni 10, chawhma dar 11:00-ah New Serchhip YMA Hall-ah neih nise, Bawrhsap Paul L.Khuma chu khuallian niin a hawnna hun hmang se an ti a, March ni 15 ralhmaa Lo leh huan hal vek tura State Level Committee-in a lo rel tawh te leh meikawng sial tura hriattirna te, ramhnuaia meichhem apiang timit zel tura hriattirna te chu chak taka bawhzui nise an ti a. Serchhip District chhunga kangmei chhuah tamna ram te zirchian nise, a huamchhung VC te hnenah ngenna siam a vil uluk lehzual tura hriattir nise an ti a. Ramkal apiangte hming ziak tura ngen nise an ti bawk.

Kangmei ven chungchanga Awareness Campaign chu awmze nei zawka neih a nih theih nan  DFO te leh Forest RO te chuan Forest Division leh Range tinah ruahmanna, Action plan mumal taka siamin District Administration-ah thehlut tura beisei an ni a. Print Media leh Social Media hmangin inzirtirna hi kalpui a nih dawn bakah School, College, Kohhran leh YMA-ah te a tam thei ang ber puanzar a ni bawk ang.

Serchhip District chhunga kangmei ven kawnga hma la tha khuate hnenah lawmman siam leh tura ruahman niin a endik turin Forest Department lamin Sub-Headquarters YMA te an thawhpui dawn bawk a ni. Nimin-a thutkhawm ah hian Environment Forests and Climate Change Department hotute, sawrkar Official dang te leh tlawmngai pawl te an tel a ni.