Him zawka Internet hman dan inzirtirna ni, ‘Safer Internet Day’ pualin nimin khan Serchhip ah pawh hun hman a ni. Ministry of Electronics and Information Technology (MEITY) chuan ‘Safer Internet Day’ hi nimin khan hmangin he ni denchhen hian program chi hrang hrang buatsaih a ni a. Serchhip District-a NIC District Unit te pawhin he ni pual hian Serchhip District-a Department tinah e-mail hmangin lehkha pawimawh leh document kaihhnawih te a thawnchhuak a ni. Safer Internet Day hi February chawlhkar hnihna Thawhlehni apiangin khawvel pumah hman thin a ni a. A bik takin naupang, thalai leh nuho zingah him zawk leh tangkai zawka internet hman dan inzirtirna ni atan hman thin a ni a. Kumin a Safer Internet Day-ah hian thupui atan ‘Together for a Better Internet’ tih chu thlan a ni.
