Mizoram in Gold Medal a lak belh leh

Zonuna Kawlni (LENKAWL) • February 10, 2025 • Comments • Mizoram

National Games 2025 neih mekah Mizoram chuan Gold Medal lak belh lehin a vaiin Medal pathum a la ve ta.

Uttarakhand-a National Games vawi 38-na neih mekah hian Taekwondo Male Team Poomsae inelna ah Mizoram Team chuan Services Sports Control Board (SSCB) hnehin Gold Medal an la a, Mizoram Team-ah hian Lalthlamuanpuia Venghlui, H.Vanlalfela Armed Veng South leh Daniel Lalhumthanga Chhinga Veng te telin Mizoram Team hian hnehna changin Gold Medal an la a ni. Hemi hmalam hian Lalthlamuanpuia hian Gold Medal a lo la tawh bawk a ni.

Heti hian Mizoram hian National Games 2025 neih mekah Gold Medal 2 leh Bronze Medal pakhat a la ta a. Mizoram hming tithatu player te bakah Mizoram Amateur Taekwondo Association (MATA) hruaitute fakawm a tih thu Sports Minister chuan a sawi a ni.