MHIP ten Aizawl-ah pungkhawm an huaihawt

Women & Child Development changtu Minister Lalrinpuii chuan Hmeichhiate chunga hleilenna rapthlak tak tak hriat tur awm ta fo mai chu zahthlak leh lungchhiatthlak hle a a hriat thu a sawi.

Tunhnaia a pasal tuara boral nia hriat Rebecca Chanchinthangi chunga thil thleng duhlohna leh pawikhawihtu chunga dan ang taka rorelna phutin nimin khan Aizawl Vanapa Hall kawt-ah MHIP General Hqrs. bultumin punkhawmna (peaceful demonstration) neih a ni a. He hun hi Women & Child Development changtu Minister Lalrinpuii chuan thlawpin a hmanpui a, he hunah hian Minister Lalrinpuii chuan Hmeichhiate chunga hleilenna rapthlak tak tak hriat tur awm ta fo mai chu zahthlak leh lungchhiatthlak hle a a hriat thu a sawi a. Mahni In lumah ngei pawh Hmeichhiate an him ta lo ni a lang te, an kawppuite kut ngei tuar a vanduaina an tawk ta fo maite chu hriatthiam har a tih thu tarlangin, danin a kawng a zawh ngei theih nan te, Hmeichhiate chunga hleilenna chu a thlen tawh lohna turte leh mipate pawh heng ang hleilenna lakah hian venpui turina sawm a, India ram danpui ngei pawhin mi zawng zawngte tana zalen leh zahawm taka nung tura dikna chanvo a pek dan te a sawifiah a. Hmeichhia tute pawhin hetiang lama harsatna an tawk a nih chuan engtik lai pawhin Helpline Number 181 chu call theih a ni tih put darhpui theuh turin a sawm nghal a ni.

He punkhawm hi MHIP General Secretary Lalliani chuan kaihruaiin MHIP President Ngurmawii Sailo chuan Hmeichhiate chunga hleilenna dodalna thu tawi a sawi a. Hemi zawh hian MHIP General Hqrs. a Committee Member Lalhmuchhuaki kaihhruaiin kalkhawmte chuan au rualna hun an hmang a, punkhawmna hi tihtawp zui a ni.

MHIP General Hqrs. chuan nimin khan thuchhuah siamin C. Lalsiamliana'n a nupui khawlaiah, a fate hmuh lai ngeia saruaka a sawisa chu an ngaithiam thei lo tih an sawi a, tualthattu hian a phu tawk hremna hmu ngei se an duh thu leh thuneituten dan anga na taka an hrem ngei an phut thu te an tarlang bawk a ni.