Kuhva rah phur tlan phal lo

Khawzawl District-a Kawlkulh Group YMA chuan thuchhuah siamin an Group huamchhung Kawlkulh leh Hliappui inkar leh Kawlkulh leh Dulte inkar kawngah te Kuhva rah phur tlan an phal loh thu an sawi.

Kawlkulh Group YMA thuchhuaha tarlan anih danin, Inrinni kalta khan Kawlkulh Group YMA Executive Meeting neiin Kawlkulh leh a chhehvel kawng te Kuhva phurtu ten an hman thin thu leh tunlai hian Kuhva rah phur motor lian leh te an tlan thin tih hriat anih thu an sawi a ni. Kawlkulh Group YMA chuan Kawkulh leh Hliappui inkar, Balaji Pvt Limited ten PMGSY III hnuaia an thawh mek chu kawng laih hna zawh fel thawkhat a ni tawh a, hun reilote-ah kawng chhuat phah a ni tawh dawn ni a hriat a nih avangin vantlang mipuite tana siam leh tangkai taka an hman mek chu dan phal loh thil phur te avanga chhiat mai an duh loh thu an sawi a.

Hei bakah hian Kawlkulh atanga Puilo kawng, SASCI hnuaia siam zawh thar te, Kawlkulh Dulte inkar bypass avanga One Time Improvement tih hmabak mek te chu Kuhva rah phur motor ten an zawh chuan reilote-ah a chhe leh vat thei dawn niin an hriat thu an sawi a, hei vang hian Kuhva rah phur Motor te Kawlkulh Group YMA huamchhungah tlan an phal tawh lova. Ngenna thuchhuah pawisa lova tlan lui an awm a nih chuan District thuneitute nena inbiakremna angin hma lak a ni dawn tih an tarlang a ni.