Eirawngbawlna Gas lak ah mipuite fimkhur turin chah

Serchhip District Consumer Association chuan Eirawngbawlna Gas Home Delivery-a kalpui a nih hnuah mipuite chu an Gas lak ah fimkhur turin an chah.

Serchhip District Consumer Association hruaitute chuan tunlaia Serchhip a eirawng-bawlna Gas Home Delivery-a sem ah a leak nasa a tam nia sawi a awm avangin Inrinni khan Ser-chhip Mizofed atanga Gas Home Delivery a semchhuah tur chu sawi lawk awm lovin an enpui tih an sawi a. Gas sem turte chu uluk taka bukin a buk lamah chuan a tha viau a, amaherawhchu Gas leak engemaw zat a awm tih finfiah a ni tih an sawi a, heng Gas leak te hi a siam theih ang ang chu Mizofed-a thawktute siamtir nghalin a siam theih loh te chu mipuia sem chhuak lo turin an hrilh tih an sawi.

SDCA hruaitute chuan eirawngbawlna Gas hi Home Deliver a sem chhuah anih tawh avangin a buk tlin leh tlin loh te, a leak leh leak loh chungchangah harsatna awm thei te tunhma anga hriat zung zung a theih tawh loh avangin mipui te chu fimkhur theuh turin an chah a, Gas leak emaw, zang lutuk emaw chu delivery Agent atanga khul lo turin an chah a, Delivery Agent leh Mizofed te pawh mipuiah eirawngbawlna Gas buk tling leh him chin chauh semchhuak turin an ngen tih an sawi bawk.

Eirawngbawlna Gas mipuia semchhuah chungchanga harsatna nei emaw, complaint thehlut duhte chuan englai pawhin Mizofed hotute hnenah emaw, District Consumer hruaitute hnenah thehluh theih reng a ni tih an sawi bawk.