Aizawl Civil Hospital-ah Kal thlak theih ve tum a ni

Aizawl Civil Hospital chu Kal thlak (renal transplant) ti ve thei tura ruahman mek a nih thu Health & Family Welfare Department hotute chuan an sawi.

Health Department hotute chuan Mizo zingah Kal thlak an tam thu sawiin, phai lama Kal thlak senso a tam em em a, hemi avang hian Mizo-ram sum tam tak phailam-ah a luangral tih an sawi a. Hei hi tihtlem a nih theihna atan Aizawl Civil Hospital-a kal thlak a nih ve theihna turin tanlak mek a ni, an ti. Hei bakah hian he damdawi Ina Lung lam natna buaipuitu, Cardiology Department chu DoNER Ministry hnuaia North East Special Infrastructure Development Scheme (NESIDS) sum hmanga thuam changtlun mek a nih thu an sawi a. NESIDS sum hmang tho hian Kolasib District Hospital a khum 100 awm theihna tur bakah District thar pathum - Khawzawl, Saitual leh Hnahthial District-a khum 50 theuh awm theihna tur District Hospital sak hna pawh thawh tan a ni tih an sawi a. Fund dang atangin khum 100 awmna Mamit District Hospital sak niin Lunglei Civil Hospital Laboratory building leh Type IV quarters Unit 6, Lawngtlai District Hospital-a Dialysis Unit, sawrkar Hospitals hrang hranga Trauma Care Facilities thuamthat leh CSR leh NESIDS sum hmanga Serchhip District Dospital sak hna te kalpui mek a ni.

Health Department tarlan danin Directorate of Hospital & Medical Education hnuaia damdawi In-ah khum (functional beds) 1057  awmin Directorate of Health Services hnuaiah khum 500 a awm a, ZMC&H-ah khum 420 a awm bakah Private Hospitals te khum neih zat belhkhawm chu 1760 a ni.

Mizoram sawrkar hnuaiah hian Specialist leh Superspecialists 169 awmin Rilru (Mental) lama harsatna neite tana engtiklai pawha biak theih Tele MANAS phone number: 14416 a awm bawk a ni.