Airport hralh kan tum lova, IAF kaltlangin changtlung zawka siam theih dan kan dap mek - Adviser to CM

Zonuna Kawlni (LENKAWL) • February 18, 2025 • Comments • Mizoram

Adviser to Chief Minister TBC. Lalvenchhunga chuan IAF kut-ah Airport an pe dawn lo tih sawiin, “Kan ramin a hlawkpui theihna tur leh changtlung zawka siam kan tum mai a ni,” a ti.

ZPM in nimin-a Chhung Inkhawm Aizawl-a an Office-a an neih ah Adviser to Chief Minister TBC. Lalvenchhunga chuan Airport chungchangah hian a mimal pawhin an bei nasa hle tih sawiin, “Lengpui Airport hi naktuk-a hlan mai tur niawm tak hian kan rilru ah a awm deuh niin ka hria a, mithiam tak tak te nen zirchianna hrang hrang kan nei a, Wing Comdr’ Pu J. Lallhmingliana hi kan zirchiannaa kan thawn hmasa ber a, min chhanna chu Airport kan enkawl zawh loh thu leh AAI-in a Dratf an neih ang hi IAF atangin nei ve phawt rawh u tiin thurawn min pe” a ti a. A thurawn anga an kal mek lai chuan a ni lo zawngin Media hrang hrangah a sawi leh nia sawiin, “Vawiin-a IAF kuta Airport hlan duh lotu te hian kum 2011-ah ram 32 Acre zet mai Jet Fighter thuhrukna tur a lo pe tawh a ni. Kum 2022-ah AAI in Mizoram sawrkar-ah MoU draft a rawn thawn leh a, khatihlaia sawrkar MNF ten an tihpuitlin hmain sawrkar a inthlak chho zui ta mai zawk a ni,” a ti a. “Airport hi hralh kan tum lova, hlan kan tum hek lo. IAF kaltlangin changtlung zawka siam theih dan kan dap mek a ni. State danga mipuiten IAF Airport an va tawm zawk ang kha ni lovin Lengpui-ah chuan kan Airport min rawn tawm ve zawk dawn tihna a ni ber,” a ti.

ZPM chuan Year of Consolidation an puan thu pawh Adviser to Chief Minister chuan sawiin, “Austery measure kan la bawk a, Department hrang hrangte sum leh pai hman dan budget kan present dawn a, a rawn lang dawn a ni. PWD-a hma kan sawnna te hi a lawmawm ka ti a, Finance Minister leh CM ni bawkin kan ram kawngte a vei em em, sum an mamawh ang te an department budget piah lam vbc.180 vel pek belh an ni a, an kawng siam pawh tunhma ai chuan a tlo turah ka ngai,” a ti a. “UD&PA in kum khat chhunga Reform target an thawh that em avangin cheng vbc. 300 kan dawng a ni. Reveneu-ah cheng vbc. 15 kan dawng a, Finance Achievement avangin cheng vbc. 250 dawn kan la inbeisei bawk a ni,” a ti bawk.