ZORO in pawi tih thu sawi

Zo Re-Unification Organisation (ZORO) chuan zalen taka thenawm ram Myanmar nena inkalpawhna Sawrkar laipui thupeka khar a ni chu pawi an tih thu an sawi a, ramri khar mek chu hawn anih theih nan theihtawp an chhuah dawn tih a sawi.

Nimin-a Aizawl Press Club-a thuthar lakhawmtute an kawmna ah ZORO General Secretary L. Ramdinliana Renthlei chuan kumin January ni 1 atanga Sawrkar laipuiin a kenkawh thenawm ram Myanmar, tlawh leh kal theihna tur a permit neih a ngaih tawhna dan thar chu pawi an tih thu sawiin, theihtawpa an dodal zel tur thu a sawi a. Hemi chungchangah hian Human Rights Council Forum on Indigenous Issue-ah pawh an lungawi loh na an thlen tawh thu a sawi bawk.

Sawrkar laipuiin dan thar a siam hnuaiah hian phalna pechhuak thei tura ruat chu Civil Officer emaw, Magistrate-te ni lo a Assam Rifle ruat an ni chu mak an tih thu ZORO chuan an sawi a. Kum 2013 khan ‘United Nations Declaration on the Rights of Indigenous People’ chu India leh ram dang 142 te pawmpuina in Human Rights Council chuan a adopt-a, ramri kham in a dan te ho chu zalen leh inpawh taka an awm theihna chanvo nei an nih thu an sawi bawk.